Қинғир ишнинг қийиғи. Марказий сайлов комиссияси аъзоси ҳибсга олинди
Қирғизистонда сайлов ва пул сўзлари деярли синоним бўлиб қолгани ҳаммага маълум. Лекин бунақаси ҳали бўлмаган эди.
Бугун, 11 сентябрь куни Бишкекда Миллий хавфсизлик давлат қўмитаси (МХДҚ) ходимлари республика Марказий сайлов комиссияси аъзоси Ақилбек Эшимовни қўлга олдилар. Бу ҳақда махсус хизмат матбуот маркази билдирди. У товламачилик йўли билан йирик миқдорда пул олганликда айбланмоқда.
Эшиевнинг адвокати Жирғалбек Бабаевнинг журналистларга билдиришича, айбланувчи суд қарори билан икки ой муддатга, яъни тергов амаллари битгунга қадар МХДҚ тергов изоляторида ўтирадиган бўлди.
Терговнинг аниқлашича, 2020 йилнинг ёзида Эшиев “Қирғизистон” партияси лидерларининг бири билан тил бириктириб олиб, фуқаро А.Д.дан 550 минг доллар пул олган. Бу пул эвазига у жабрланувчини 2020 йилнинг кузида ўтадиган сайловда аталган партия рўйхатининг биринчи бешлигига киритиб қўйишни ваъда қилган. Бу ваъдани бажара олмагач, олинган пулнинг 300 минг долларини жабрланувчига қайтариб беришган, қолганини эса ўзлаштириб олишган.
Қолган пулини яхшилик билан қайтариб олишга кўзи етмаган А.Д. тегишли давлат идораларига мурожаат қилишга мажбур бўлган.
Биз аввал ёзганимиздек, парламент депутатлигига даъвогарлар депутатликка сайланиш учун партия ўпқонига 100 мингдан миллион долларгача пул тўлашга рози бўлишмоқда. Бунинг сабаблари турлича. Лекин юқоридаги ҳолатда кишини ҳайратга соладиган нарса – жабрланувчининг Марказий сайлов комиссияси аъзосига пул бергани. Ахир рўйхатга кимни ва қайси ўринга киритишни партия раҳбарияти ва съезди ҳал қиладида.
Шу қадар гўл одамларнинг парламент депутатлигига даъво қилаётганидан беихтиёр ёқа ушлайсан одам…
Бобур Мирзоев, Оқбура, Бишкек
