Мирзо Улуғбекнинг ишлари давом этади: Ўзбекистон фазони ўрганиш йўлида
Ўзбекистон миллий космик дастурни ишлаб чиқишда Илон Маскнинг компаниясидан кенгашлар олади.
Фазони ўзлаштириш борасида фаолликни ошириб бораётган «Ўзбеккосмос» агентлиги соҳа билан шуғулланган давлат ва компаниялар билан алоқани кучайтирмоқда. Жумладан, куни-кеча Италиянинг Милан шаҳрида ўтган 75-Халқаро астронавтика конгрессида иштирок этди. Анжуманда 120 давлатдан 11 мингдан ортиқ космик агентликлар ва халқаро ташкилотлар, илмий таълим марказлари раҳбарлари, жаҳон космик ҳамжамияти вакиллари иштирок этишди
«Ўзбеккосмос» агентлигининг хабар беришича, конгрессда Ўзбекистон делегацияси аъзолари Халқаро астронавтика федерацияси лидерларининг учрашувида махсус баёнот билан чиққан. Баёнот мазмуни ҳақида ташкилот ортиқча маълумот бермаган.
Анжуман доирасида Ўзбекистон вакиллари Халқаро астронавтика федерацияси, Интерспутник халқаро ташкилоти каби йирик хорижий агентликлар раҳбарлари билан ўттиздан кўпроқ ўзаро манфаатли бўлган учрашувлар ўтказдилар. Хусусан, Япониянинг роботлаштирилган космик аппаратлар ва бошқа технологиялар ёрдамида Ойни тадқиқ қилишга ихтисослашган Ispace компанияси билан ўзаро англашув меморандуми имзоланган. Анжуманда Ўзбекистон вакилларининг чиқишларига катта қизиқиш билдирилган. Жумладан, дунёнинг энг бой одами Илон Маскнинг коинотни ўзлаштиришда илғорликни қўлдан бермай келаётган SpaceX хусусий ширкати Ўзбекистонга илмий-амалий ёрдамлар беришга тайёр эканини маълум қилган.
«АҚШнинг SpaceX ва Буюк Британиянинг Surrey Satellite Technology компаниялари Ўзбекистоннинг миллий космик дастурини ишлаб чиқишда эксперт маслаҳатларини беришга тайёр эканликларини билдиришди», – дейилади «Ўзбеккосмос» агентлиги тарқатган хабарда.
Япониянинг Кюшу технологик институти билан аэрокосмик муҳандислик йўналишида мутахассисларни тайёрлаш бўйича дастлабки битимларга келишилган.
Ўтган йили «Ўзбеккосмос» агентлиги Халқаро астронавтика федерациясига тўла ҳуқуқли аъзо сифатида қўшилган. Аввалроқ Ўзбекистон космик фазони, шу жумладан, Ойни ва бошқа самовий жисмларни тадқиқ қилиш ҳамда улардан фойдаланиш бўйича давлатлар фаолияти принциплари тўғрисидаги шартномага қўл қўйиб, бу ҳақда махсус қонунга қўл қўйилган.
Шундай қилиб, бир неча асрлар аввал коинотни ўзлаштиришда пешқадамлик қилган олим ва мутафаккир Мирзо Улуғбекнинг бугунги авлодлари муносиб қадамлар билан унинг изидан боришга интилмоқдалар.
Оқбура, Бишкек.
Расм интернетдан олинди
