“Интимақ” тугатилди, баҳамжиҳатлик бардавом бўлсин
Қирғизистонда кўрсатувларини қирғиз ва ўзбек тилларида олиб борувчи телеканал тугатилди.
Қирғизистонда давлат тили билан бир қаторда ўзбек тилида ҳам эфир соатларига эга бўлган ягона телерадиокомпания “Интимақ” ҳудудий жамоатчилик телерадиокомпанияси (ҲЖТР) тугатилиб, миллий телерадиокомпания (МТРК) қарамоғига ўтказилди. Бу ҳақдаги қарор Қирғизистон Республикаси Вазирлар маҳкамаси раиси Ақилбек Жапаров томонидан 24-июль куни имзолангани маълум бўлди.
Бунгача телерадиокомпания Маданият, ахборот, спорт ва ёшлар сиёсати вазирлиги тасарруфида бўлган.
МТРК бош директори Бўлўтбек Тиллебаев 4-август куни собиқ «Интимақ” телерадиокомпанияси жамоаси билан танишгач, жамоани янги компанияга ўтгани билан табриклади. Унинг сўзларига кўра, телерадиокомпаниянинг тугатилиши Қирғизистоннинг 7 вилоятидаги телекомпанияларнинг барчасини миллий телерадиокомпания қарамоғига олиш режаси билан боғлиқ эканини таъкидлади.
“Ўш вилоятида вилоят телекомпанияси бўлмагани учун «Интимақ” ҲЖТРсини вилоят телекомпаниясига айлантирдик. Энди у УТРК Ош (“МТРК Ўш”) рамзи билан иш юритади”, деди у.
Унинг айтишича, янги номдаги телерадиокомпания бундан кейин бошқа вилоятлардаги каби вилоят сиёсий, иқтисодий, маданий-ижтимоий ҳаётини акс эттириш йўлидаги фаолиятини давом эттиради.
Жорий йилнинг апрель ойида “Интимақ” медианинг бош директори Бақит Айдаров ўз ихтиёрига кўра ишдан кетди. Телевидение икки ой давомида раҳбарсиз фаолият кўрсатиб келаётган эди. Шундан сўнг, июн ойида кузатув кенгашининг қарори билан Эрмек Муратбек уулу бош директор бўлиб тайинланди. У ўз лавозимида қоладиган бўлди.
Унинг сўзларига кўра, телерадиокомпания ўз фаолиятини аввалгидек давом эттираверади, ходимлар ўз ўрнида қолади. Жумладан, ўзбек тилидаги дастурлар ва уларнинг журналистлари ҳам ишларини аввалгидек давом эттирадиган бўлди.
Эслатиб ўтамиз, “Интимақ” 2010-йил июнида Ўш ва Жалолобод вилоятларида содир бўлган миллий низодан кейин, икки миллат ўртасидаги совуқликни бартараф этиш учун республика ҳукуматнинг 2011-йилдаги қарори билан очилган. 2019-йилгача ҳорижий ташкилотлар томонидан молиялаштириб келган.
Дастлаб, радиолавҳа сифатида ярим соатлик эфир икки тилда, қирғиз ва ўзбек тилларида олиб борилган. 2012-йил 29-августда радио тўлқинда 24 соатлик ўзбек, қирғиз тилларида радио эшиттиришлар, қўшиқлар янграй бошлаган. Интернетда ҳам ўз саҳифасига эга бўлган. Ўша йилнинг декабрь ойида эса телевидение ҳам ташкил этилиб, кейинчалик телерадиокомпания қошида икки миллат орасидаги баҳамҳатликни мустаҳкамлашга қаратилган “Биз” деб номланган икки тилли газета ҳам ташкил этилган.
“Интимақ”нинг МТРК тасарруфига ўтгани ҳақидаги хабар ижтимоий тармоқларда баҳс-мунозараларга сабаб бўлди.
Фейсбук фойдаланувчиларининг айримлари ўзбек тилидаги эфирларнинг тақдири билан қизиқди. Номи янгиланган медианинг ишига муваффақиятлар тилаганлар ҳам бўлди.
“Интимақ”да 3 йилдан буён кўнгилочар дастурлар билан фаолият юритиб келаётган журналист ўзининг Фейсбукдаги саҳифасида компаниянинг номини сақлаб қолиш учун ҳукуматга бир неча бор видео ва матн кўринишидаги мурожаатлар йўлланганини, меҳнат жамоасининг бу ғояга қарши бўлганини маълум қилган.
Алтинбек Миркамилов деган профил эгаси унга изоҳ қолдириб, “шу ўзбекчани қўймаганингларда жуда яхши бўларди. Ўз вақтида “Ўш ТВ” ҳам шундай халқнинг қонини қайнатарди. Бу миллатчилик эмас, ватанпарварлик”, деб ёзган.
Эслатиб ўтамиз, “Ўш ТВ” хусусий телекомпания бўлиб, эфир асосан ўзбек тилида олиб бориларди. Сўнгра қонунга кўра кўрсатувларининг ярмига яқини қирғиз тилида олиб бориладиган бўлган. 2010 йилги қонли воқеалардан кейин унинг эгаси Ҳалилжон Худойбердиев чет элдан бошпана олишга мажбур бўлган. Телекомпания эса қўлдан қўлга ўтиб юриб, ҳозирда эфири тўла қирғиз тилида олиб борилади.
Қаникей Қурманбекова деган фойдаланувчи эса, Ўзбекистонда бирорта ҳам қирғиз тилидаги эфир ёки кўрсатув йўқлигини айтиб, изоҳ қолдирган.
Миллий телерадиокомпаниянинг бош директори Бўлўтбек Тиллебаев ўзининг Фейсбукдаги саҳифасида “Сочилганни қайта тўпладик”, деб бошланган постига «Интимақ” медианинг собиқ бош директорларидан бири бўлган Данияр Садиев қуйидагича изоҳ қолдирган:
“Менимча, сиз тарқоқларни йиғдик, деб бироз бўрттириб юбордингиз. Тайёр компанияни қўлга киритдик, десангиз тўғри бўларди. «Интимақ” йўқ жойдан меҳнат билан қурилган ва самарали ишлаётган (ҳуқуқий, техник, жисмоний ва инсон ресурслари) компания. Сиз 3-4 ходими билан мухбирлик пунктига маблағ сарфлаб [унинг ишини ташкил этиб, кейин уни] Ўш телекомпаниясига айлантириб қўйганингизда сўзингиз тўғри бўларди.
Садиевнинг эътироф этишича, ўтган 11 йил ичида ушбу телерадиокомпания рейтинги бўйича мамлакатдаги энг илғор 10 та телерадиокомпания қаторига кирган ва ўзининг кенг аудиториясига эга бўлган.
Оқбура, Бишкек.
Расм интернетдан олинди
