Мигрантлар: Россияда енгил ҳаёт тугади, буёғига нима бўлади?

Бугун, 15 июнда Россиядаги меҳнат мигрантлари учун тож вируси пандемияси сабабли ўтган йилнинг апрель ойида берилган енгилликлар муддати тугади.

Россия ҳуқуқ-тартибот органларидаги манбанинг ТАСС ахборот агентлигига берган маълумотига кўра, аталган енгилликлар бугун, яъни 2021 йилнинг 15 июнига қадар амалда бўлган. Яъни, карантин сабаб мамлакатда қолиб кетган чет эл фуқаролари рухсат қоғозисиз бемалол у ерда қолиб ишлаб туришлари мумкин эди. Манбанинг айтишича, бу қоидалар муддатини узартириш масаласи қаралмаган.

Ўтган йилнинг апрелида тож вируси пандемияси кучайиб кетганда чегаралар ёпилиб, Россияда қолиш муддати тугаган миллиондан ортиқ чет эл фуқароси мамлакатдан чиқиб кета олмай қолган эди. Буни ҳисобга олиб, Россия президенти Владимир Путин уларга енгиллик бериш ҳақида махсус фармон чиқарган.

Россия Миграция хизматида аталган енгилликлар муддатининг узартилгани ҳақида маълумот йўқ экани маълум бўлди. Бу хизмат ходимлари журналистларга 15 июндан кейин нима бўлишини айтиб бера олишмаган. Агар енгилликлар узартилмай қолиб кетса, унда Россияда қолишга рухсат берувчи ҳужжатларини тўлдириб улгурмаган чет эл фуқаролари у ердан чиқиб кетишлари лозим бўлади. Бунинг устига агар мигрант тож вируси билан боғлиқ карантин даврида тўлиқ Россияда бўлган бўлса, 90 кунгача Россияга қайтиб кира олмайди.

Буни олдиндан билган мигрантлар рухсатнома олиш учун Миграция хизматига югура бошлаганлар. Навбат кўплигидан одамлар қабулга бир неча кун олдин ёзилиб қўйишга мажбур бўлмоқдалар. Масалан, Федерал Миграция хизматининг Москва шаҳрига яқин жойлашган бўлимларидан бирида мигрантлар навбатга 29 июнга қадар ёзилишган.

Россия оммавий ахборот воситалари хабар берганидек, Россия Ички ишлар вазири ўринбосари Александр Горовой шу йилнинг апрель ойида ўтган МДҲ давлатлари Парламентлараро ассамблеяси йиғилишида сўзга чиқиб, МДҲ давлатлари вакилларига мурожаат қилган. Амалдор улардан Россия ҳудудида ноқонуний юрган меҳнат мигрантлари билан профилактика ишлари юритишни сўранган ва акс ҳолда уларни мажбурлаб мамлакатдан чиқариб юборишга тўғри келишини эслатган эди.

Горовой шуни ҳам таъкидлаб ўтган эдики, 2021 йилнинг 15 июнига қадар миграция қонунларини бузган шахсларга нисбатан ҳеч қандай жазо чоралари қўлланмайди. Бугун эса ана шу муддат тугади. Бир йилдан ортиқроқ вақт давомида қанча фуқаро зарур ҳужжатларини тўғрилаб улгурди? Улгурмаганларнинг тақдири энди нима бўлади, ҳозирча ноъмалум. Турли маълумотларга кўра Россияда 1 миллиондан ортиқ қирғизистонликлар яшаб меҳнат қиладилар.

Россия ИИВ берган маълумотга кўра, ўтган йилнинг март ойида бошланган тож вируси билан боғлиқ карантин бошланганда Россияда юриш муддати тугаган 1 миллион 600 минг чет эл фуқаролари бўлган. Карантин даврида улардан 450 нафари Россиядан мажбурий тарзда чиқарилиб, махсус рейслар билан ватанларига жўнатиб юборилган.

Абдумўмин Мамараимов.

Сурат gazetaimpakt.com сайтидан олинди.