Охири қопқонга тушди. Қирғизистон соғлиқни сақлаш вазири қамалди
Бош прокуратура унга ва ходимларига қарши етти жиноий иш қўзғалганини маълум қилди.
Республика Бош прокуратурасининг матбуот хизмати тарқатган маълумотга кўра, Қирғизистон соғлиқни сақлаш вазири Алимқадир Бейшеналиев коррупцияда ва бошқа қатор жиноятларда айбланиб қамоққа олинган.
Бош прокуратура берган маълумотга кўра, Қирғизистон жаҳонда КОВИД-19 пандемияси кучайиб турган пайтда, яъни 2020 йилнинг декабридан тортиб 2021 йилнинг сентябрига қадар Халқаро ташкилотлар, жумладан Россия, Хитой, Озарбайжон ва Қозоғистондан 451 минг дозадан кўпроқ коронавирусга қарши вакцинани гуманитар ёрдам сифатида олган. Бундан ташқари Хитой ва Россия давлатлари раҳбарлари билан тузилган битим асосида мамлакатга 6 миллион доза вакцина берилган.
Шунга қарамай, вазир Алимқадир Бейшеналиевнинг шахсий кўрсатмасига биноан 2021 йилнинг 4 ойи ичида чет эллик хусусий компаниялардан 1,6 млрд. сўмга яқин маблағ келиб тушган. Бошқача айтганда, асоссиз равишда қўшимча 2 миллион 460 минг доза вакцина сотиб олинган. Улар учун тўланадиган пуллар эса оффшор банк ҳисобларига ўтказиб берилган.
Натижада 3 миллион доза вакцина ортиқчалик қилиб, вакциналарнинг катта қисмининг фойдаланиш муддатлари ўтиб бораяпти. Бунинг оқибатида давлатга 1 миллиард 581 минг сўмдан кўпроқ зарар келтирилган. Эслатиб ўтамиз, сўнгги ойларда Қирғизистонда ковидга чалинган одамлар деярли бўлмаётгани боис одамлар унга қарши эмланишни лозим кўрмаяптилар.
“Коррупция факти бўйича жиноий иш қўзғалди. Вазирга ва вазирликнинг бошқа ходимларига нисбатан етти жиноий иш қўзғалиб, тергов ишлари олиб борилмоқда”, деб хабар беради вазирлик.
Вазирдан ташқари унинг ўринбосари Улук-Бек Бектурганов, Республика иммунопрофилактика маркази директори Гульбара Ишенаписова ва вазирликнинг дори воситалари ҳамда тиббий ускуналар бўлими бошлиғи Султан Сатарбековлар ҳам қўлга олинган.
Вазир Алимқадир Бейшеналиев – Қирғизистонда энг кўп муҳокама қилинаётган юқори даражадаги амалдор. У ўзининг президент Садир Жапаровга яқин эканини пеш қилиб, бошқа амалдорларни, қўл остида ишлаган ходимларни, ўзининг позициясига қарши чиққан ҳар қандай фуқарони ҳақорат қилиб, ўзбошимчалик билан ишлаб келаётган эди.
Жумладан, у Қирғизистон Қаҳрамони, дунё таниган хирург, 85 ёшли Эрнст Акрамовни обрўсини ерга урадиган сўзларни айтиб, уни ишдан ҳайдаб юборганини маълум қилган. Бу жамоатчиликда катта норозилик туғдириб, вазирга нисбатан петициялар эълон қилинган. Шундан сўнг президент Садир Жапаров ижтимоий тармоқларда вазир ҳақида ёзиб, айрим камчиликларини тан олган ҳолда, Бейшеналиевни ишини мақтаган.
Яқинда вазирнинг уч ўринбосари унинг устидан шикоят қилиб, тегишли органларга мурожаат қилишган эди.
Оқбура, Бишкек.
Расм Бош прокуратуранинг матбуот хизматига тегишли
