Чегарада тартиб йўқ! Парламент депутати қирғиз чегарачиларини юлғичликда айблади
Ўзбекистон билан боғловчи “Дўстлик” пости ҳамон Қирғизистон юзидаги қора доғ бўлиб турибди.
Қирғизистон парламенти депутати Алишер Козуев Ўш шаҳри яқинидаги “Дўстлик” чегара постида айрим қирғиз чегарачиларининг одамлардан ноқонуний пул олаётганини айтиб чиқди. Парламент йиғилишида сўзга чиққан депутат чегарачиларнинг ўтиш пунктида сунъий равишда навбат пайдо қилиб, кейин пул эвазига ўтказишаётганини айтди.
Халқ вакили Ўзбекистон ва Қирғизистон чегараларида жами 15 ўтказиш пункти мавжудлигини ва бир кунда фақат биргина постдан 10 минг одам ўтишини эслатди.
“Бизнинг фуқароларимиз Ўзбекистонга боришяпти ва уларда туризмни ривожлантиришяпти. Андижондан бошлаб Тошкентгача оддий одамлардан тортиб йўл милицияси ходимларигача ҳаммаси хушмуомала… [Бизда эса], ўтказиш пуктидан биз томонга ўтишинг билан, – тушунарсиз одамлар у ерда монополия тузиб олишган, – ўз таксичилари ва маршруткалари ишлайди. Йўлкира 200 сўм бўлган жойга улар 2 минг сўмдан 5 минг сўмгача талаб қилишади. Бунга қараб туриб, уяласан”, – деди Алишер Козуев.
Депутатнинг сўзларидан сўнг Давлат миллий хавфсизлик қўмитасига қарашли Чегара хизмати раддия тарқатди. Унда айтилишича, депутат айтган муаммолар йўқ. Чегара хизмати депутатга айтилган масалалар бўйича фактлар келтиришни сўраган. Бу ҳокимият вакиллари берадиган доимий жавоб, лекин ҳақиқатда аҳвол бошқача экани ҳақида маълумотлар тўхтамаяпти.
Чегарадаги бу муаммолар, хусусан “Дўстлик” постида депутат тилга олган каби ҳунук кўринишлар ҳақида кўп айтилади. Бу ҳақда биз ҳам ёзганмиз. Лекин у ерда тартиб ҳамон ўрнатилгани йўқ. Юқорида депутат Козуев айтиб ўтганидек, чегаранинг икки томони – икки мутлақо бошқа-бошқа дунё. Интернетда ҳам чегарада хорлик кўрган фуқароларнинг видеолари ва постлари чиқиб турибди.
Уч йилча аввал яна бир депутат Жанар Ақаев ҳам Ўш аэропортидаги порахўрлик ва таксичиларнинг ўзбошимчаликлари масаласини кўтарган эди. Унинг сўзларига кўра, Ўш аэропортида чегарачилар қўшни давлат фуқароларини қўрқитиб, чегарадан ўтиш учун пул талаб қилмоқда эди.
“Ўш халқаро аэропорти орқали кўплаб Ўзбекистон ва Тожикистон фуқаролари Россияга учиб кетишади, чунки бизда чипталар арзон. Аммо чегарачиларимизнинг уларга бўлган муносабати яхши эмас. Паспортларини йиғиштириб олиб, қўрқитишади ва чегарадан ўтказиш учун пул сўрашади. Бу қачон тўхтайди? Қўшни давлат фуқаролари пулларини бизда қолдиришаяпти. Бишкек ва Ўш аэропортларининг ҳамма жойида видеокамералар ўрнатиш керак”, деган эди Жанар Ақаев.
Бир йил аввал «Азаттик» радиоси Ўзбекистон фуқароларининг чегарадаги юлғичликлар ҳақида Қирғизистон президентига мурожаат қилишгани ҳақида ёзган эди.
Бу аҳволни кўриб туриб, “балиқ бошидан…” деган гап эсингга келади. Лекин наҳотки қандайдир погонли амалдорнинг чўнтаги бутун бошли давлатнинг халқаро нуфузи, қўшнилар билан алоқалардаги иззат-ҳурмат, инсоф деган тушунчалардан юқори турса?! Миллий номусчи? Умуман, бизникиларда ана шундай тушунча борми ўзи?!
Сўнгги йилларда Қирғизистон ва Ўзбекистон ўртасидаги иқтисодий-сиёсий, маданий-маърифий ва бошқа соҳалардаги алоқалар тез суръатлар билан ривожланиб, кенгайиб бормоқда. Чеара постлари очилиб, оддий одамлар ўртасидаги борди-келди ҳам фаоллашган. Икки давлат раҳбари ўзаро алоқаларни янада кучайтириб, давлатлар ўртасидаги савдо-сотиқ кўламини 1 млрд. долларга етказиш устида иш олиб боришяпти, Қирғизистон-Хитой-Ўзбекистон темирйўлини қуришдек улкан лойиҳалар устида бош қотиришяпти.
Мана шундай буюк ўзгаришлар даврида ҳамон текинхўрлик билан, паразитлик қилиб кун кечиришда давом этаётган, шу билан давлат юзига оёқ қўяётган амалдорлар ва ходимлар кимларнинг ҳифзу-ҳимоясида экани қизиқ. Наҳотки уларга давлат хавфсизлиги хизмати ва президентнинг ҳам кучи етмаса?
Оқбура, Бишкек.
Расм интернетдан олинди
