Иссиқкўл бўйидаги Осмон шаҳрини Тимур Файзиев қурадиган бўлди
Бу экологик тоза келажак шаҳри Қирғизистоннинг янги пойтахти бўлиб қолиши мумкин.
Қирғизистон Республикаси президенти маъмурияти тарқатган хабарга кўра, қирғизистонлик таниқли ишбилармон ва бизнес-тренер, замонавий турар-жой биноларини қуришга ихтисослашган “Elite House” қурилиш компанияси асосчиси ва раҳбари Тимур Файзиев Иссиқкўл бўйига қурилиши режалаштирилган “Экологик тоза Осмон шаҳри”ни қуриш бўйича давлат дирекциясининг бош директори этиб тайинланди. Бу ҳақдаги буйруққа вазирлар маҳкамаси раиси Ақилбек Жапаров қўл қўйган.
Тарқатилган хабарда айтилишича, аталган давлат дирекциясига замонавий технологик ютуқлар даражасида ривожланган инфратизимга эга бўлган экологик тоза “Осмон” шаҳрини лойиҳалашириш ва қуриш бўйича давлат органлари ҳамда маҳаллий ўзини ўзи бошқариш органларининг ишини мувофиқлаштириш, фуқаролик жамияти, хусусий сектор ҳамда халқаро ташкилотлар билан биргалашиб ҳаракат қилишни таъминлаш ишлари юкланган.
“Осмон” шаҳри қурилиши ҳақида Қирғизистонда бир неча йиллардан бери айтилиб келади. Ниҳоят, кимларнингдир орзуси ва хаёлий режалари амалий ишга айланиб, бу лойиҳа бўйича дадил қадамлар ташлана бошлади. Жумладан, шу кунларда Туркиядан бу лойиҳага сармоя қилиш истагида бўлган 25 нафар ишбилармонларнинг келаётгани маълум бўлди. Дастлабки маълумотлар бўйича янги шаҳар 500 минг одам яшашига мўлжалланган. Кейинроқ уни миллион кишига етказиш кўзда тутилган.
Шаҳарда энг замонавий ва экологик тоза инфратизим, экологияга зарар келтирмайдиган корхоналар барпо этилиб, шаҳар аҳолиси тўла иш билан таъминланади. Қурилиш ишларига 10 миллиарддан 20 миллиардгача АҚШ доллар сарфланиши айтилмоқда. Бишкек сити деб ҳам аталаётган бу шаҳар амалда Қирғизистоннинг янги пойтахти бўлиб қолиши керак.
Тимур Файзиевнинг Инстаграм тармоғида сўзлаган нутқида шаҳар қурилиши ўртача ҳисобда 7-8 йилда битиши кўзда тутилган.
Эслатиб ўтамиз, 2006 йилда Москванинг ўша пайтдаги мэри Юрий Лужков Иссиқкўлга келиб, бугун “Осмон” шаҳри қурилиши режалаштирилган жойни кўриб кетган. У маҳаллий аэропортни халқаро аэропортга айлантириб, унинг атрофига улкан туристлар шаҳрини барпо қилиш ҳақида гапирган. Бироқ ноъмалум сабабларга кўра бу гаплар гаплигича қолиб кетаверган.
Тимур Файзиев Қирғизистоннинг Жалолобод шаҳрида, байналминал оилада туғилган, 41 ёшда. Отаси ўзбек, оилали, 4 фарзанди бор, рус ва ўзбек тилларида эркин гапиради. Ёшлигидан бизнес билан шуғулланган. Унинг жуда диндор одам эканини атрофидагилар яхши билишади.
Кўп йиллардан буён бизнес-тренер сифатида ҳам фаолият юритиб келади. Ижтимоий тармоқлардаги каналларида миллионлаб мухлисларига эга. Файзиев 2019 йили Россияда таъсис этилган нуфузли “Миллий буюклик” мукофотининг “Безупречная репутация” (яхши ном эгаси) номинацияси ғолиби бўлган. Мукофот Россия Давлат думаси қўлловида “Ишбилармон Россия” жамоатчилик бирлашмаси томонидан таъсис этилган.
Ҳар қандай бой, муваффақиятли одамда бўлганидек, Тимур Файзиевнинг атрофида ҳам турли миш-мишлар юради. Ўтган йилнинг май ойида кутилмаганда унга қарши жиноий иш очилгани маълум бўлди. Тергов берган маълумотга кўра, у Бишкек шаҳри марказида турар-жой биноси қурилиши учун олган ерини коррупция йўли билан қўлга киритган.
Кейинроқ берилган маълумотга кўра, Файзиев ўша иш бўйича давлат фойдасига икки миллион доллар товон тўлаб берган. Кейинги пайтда Қирғизистонда кўплаб бойлардан давлат ҳисобига катта миқдорда пул ундириш орқали улар йўл қўйган қонунбузарликлар учун жавобгарликдан озод қилиниб келмоқда.
Оқбура, Бишкек.
Расмлар интернетдан олинди
