Ана холос! Қирғизистон Қамбарота ГЭСини мустақил қуришни режалаштиряпти
Бунгача бу қурилиш учун давлат чет эл сармоядорларини излаб келаётган эди.
Қирғизистон энергетика вазири Дўсқул Бекмурзаев “Озодлик” радиосининг қирғиз хизмати билан бўлган суҳбатда Қирғизистоннинг “Қамбарота-1” ГЭСини ўз ҳисобидан қуриш режасини ўрганаётганини билдирди.
Вазирнинг айтишича, аталган ГЭСни давлат маблағлари ҳисобига қуриш Қирғизистон учун қулай бўлади.
“Оптималлаштириш, ислоҳотлар натижасида ҳозир бюджет маблағлари иқтисод қилиб қолинмоқда. Бу пулларнинг барчаси янги қувват яратиш учун сарфланиши лозим”, – деган Бекмурзаев журналистга.
Эслатиб ўтамиз, Қирғизистон кўп йиллардан бери “Қамбарота-1” ГЭСини қуриш учун четдан ҳамкор ёки сармоядорларни излаб келаётган эди. Ниҳоят, республика ҳукумати 2012 йилда Россия билан Норин ГЭСлари каскадини (жами 4 ГЭС) ҳамда “Қамбарота-1” ГЭСини ҳамкорликда қуриш бўйича шартнома имзоланган.
Россия бу лойиҳани амалга оширишни пайсалга солавергач, 2018 йили ўша пайтдаги президент Алмазбек Атамбаев жаҳл билан Қирғизистоннинг бу шартномадан чиққанини эълон қилган. Бунгача лойиҳа ишларига 37 миллион АҚШ долларини сарфлаб қўйган Россиянинг “РусГидро” компанияси бу пулларни қайтаришни талаб қилган. Бироқ бу масала ҳалигача ҳал бўлмаган.
Кейинроқ Ўзбекистон ва Қозоғистон ҳам бу лойиҳада иштирок этиш истагини билдиришган. Қирғизистон Республикаси президенти Садир Жапаров 2021 йилнинг мартида “Озодлик” радиосининг қирғиз хизматига берган интервьюсида “Қамбарота-1” ГЭСини Ўзбекистон билан бирга қуриш ҳақида битимга келинганини маълум қилган эди.
Аталган ГЭС қурилишига қўшни Ўзбекистоннинг собиқ президенти Ислом Каримов ҳамда қўшни Тожикистон президенти Эмомали Раҳмон доимий равишда кескин қаршилик билдириб келишган.
Оқбура, Бишкек.
Сурат интернетдан олинди
