Қўшниларда нима гап? Қозоғистон оммавий тартибсизликлар қуршовида

Айрим ҳудудларда фавқулодда ҳолат жорий этилиб, республика ҳукумати истеъфога кетди.

Сўнгги маълумотларга кўра, қўшни Қозоғистонда рўй берган оммавий тартибсизликлар туфайли 200 нафар фуқаро ҳибсга олинган, 95 полиция ходими турли даражада тан жароҳати олган. Қирққа яқин автомашинага зарар етказилгани ҳам айтилмоқда. Намойишчиларни тарқатиш ва ҳибсга олиш давом этмоқда.

Янги йилнинг иккинчи кунида одамларнинг оммавий норозилигига 1 январдан тортиб автомобилга қуйилувчи суюлтирилган газ нархининг икки баравар ошиши, яъни 60 тангадан 120 тангага кўтарилиши сабаб бўлган. Аввалига норозилик акциясига Жанаозен ва Ақтау шаҳарлари аҳолиси чиққан бўлса, кейин намойишлар республика пойтахти Нур-Султан ва собиқ пойтахт Алмати шаҳри ва бошқа жойларда уланиб кетди.

Намойишчилар газнинг нархини туширишни ва ҳукуматнинг, ҳатто президентнинг истеъфосини талаб қилишмоқда.

Аҳволнинг жиддийлиги шундан ҳам кўриниб турибдики, президент Қасим-Жўўмарт Тўқаев ҳукумат истеъфосини қабул қилди ва Алмати шаҳри ҳамда Манғистау вилоятида 5 январдан 19 январгача фавқулодда ҳолат жорий қилинди. Бу ерларда тунги соат 23.00дан эрталабки соат 07.00га қадар комендантлик соати киритилди.

Алмати шаҳри аэропорти кучайтирилган тартибда қўриқлана бошлади, бироқ доимий тартибда ишламоқда. Самолётларнинг учиши ва қўнишида муаммо йўқ.

Қўшни Қирғизистоннинг Қозоғистон билан чегарасидаги постларида янги йил байрамлари муносабати билан 2021 йлнинг 30 декабридан тортиб кучайтирилган тартибда ишлаш жорий қилинган. Чегарада аҳвол тинч ва барқарор экани айтилди.

Президент Қасим-Жўўмарт Тўқаев юртдошларини “ақлни ишлатиб ҳаракат қилишга, ички ва ташқаридан келаётган иғволар таъсирига берилмасликка” чақирди.

“…Ҳокимият қуламайди. Лекин бизга можаро эмас, ўзаро ишонч ва мулоқот керак”, – деди у ўзининг видео мурожаатида.

Оқбура, Бишкек.

Сурат интернетдан олинди

боғлиқ хабарлар

Изоҳ қолдиринг