Андижонда туғилган: Россияда буюк совет кардиохирурги Ренат Акчурин вафот этди
Акчуриннинг исмини кўпчилик Борис Ельциннинг юрагини операция қилганидан кейин билиб олганди.
Кеча, 6 октябрь куни Россия Миллий кардиология тиббий-тадқиқот маркази бош директори ўринбосари, таниқли кардиохирург Ренат Акчурин узоққа чўзилган хасталикдан сўнг 78 ёшида вафот этди. Буюк олим 1996 йили Россиянинг биринчи президенти Борис Ельциннинг юрагига жарроҳлик амалиётини ўтказган хирурглар бригадасига раҳбарлик қилган. Ҳаёти қил устида турган Ельцин амалиётдан кейин яна 10 йил яшаган.
Айтишларича, амалиётдан сўнг Ренат Акчурин сочини олдириб ташлаган экан. Буни кўрган Ельцин нима гаплигини сўраганда у, “тайёрланяпман, Борис Николаевич”, деб жавоб берган ва бу атрофдагиларнинг қаҳқаҳасига сабаб бўлган эди. Бу қамоққа олинишдан олдин соч олинишига ишора бўлиб, чинданам агар амалиёт натижаси яхши бўлмаганда унда иштирок этган хирургларнинг қамалиб кетиши турган гап эди.
Акчурин буюк кардиохирург бўлиш билан бирга чинакам инсон ҳам эди. Миннатдор бўлган Ельцин ундан нима ёрдам кераклигини сўраганда, у ҳалигача тор коммунал уйларда яшаб келаётган ходимларига квартира беришларини сўраган.
Кўпчилик Ренат Акчуриннинг бизнинг юртдошимиз бўлишини билмаса керак. У 1946 йилнинг 2 апрелида Андижонда, ўқитувчилар оиласида туғилган. Миллати татар. Аввал Андижон тиббиёт институтини, кейинроқ Москвадаги И.Сеченов номидаги тиббиёт институтини битирган. Тиббиёт фанлари доктори, профессор, Россия Фанлар академияси академиги бўлган Акчурин Ренат Сулейманович жаҳон миқёсида тан олинган мутахассис бўлиб, Россияда кардиология илмининг қатор йўналишларга асос солган.
Марҳумнинг туғишган акаси Расим Акчурин 1931 йили Тошкент вилоятининг Зангиота қишлоғида туғилган. У СССР Ҳаво кучлари мудофааси қўшинларининг қўмондони бўлган.
Акчуринлар оиласининг яна бир вакили Вилор Акчурин Самарқандда туғилиб, сўнгида тақдир тақозоси билан Қирғизистоннинг Ўш шаҳрида яшаб қолган. Маълум вақт Ўшдаги “Ленинский путь” газетасида мухбир, сўнг бош муҳаррир бўлиб ишлаган. Ҳаётининг сўнгги йилларига қадар Бишкекдаги “Слово Қиргизстана” ҳукумат газетасида бош муҳаррир ўринбосари лавозимида ишлаган. Умумий ҳисобда ярим асрлик умрини журналистикага бағишлаган.
Биз Ренат Акчуриннинг оиласи ва яқинларига таъзия изҳор қиламиз.
Оқбура, Бишкек.
Расм интернетдан олинган
