Санкциялариям ўлсин! Қирғизистонда оммабоп банк Россиядан пул ўтказишни тўхтатди

Россия-Украина уруши туфайли ғарб давлатлари киритаётган санкциялар яна аҳолига муаммо туғдирди.

Қирғизистон аҳолиси Россиядан пул ўтказишнинг энг қулай тизимларидан бири хизматидан маҳрум бўлишди. Энди Россияда ишлаётган қирғизистонликлар уйларига пул ўтказиш учун санкцияга учрамаган бошқа банклар хизматидан фойдаланишга мажбур. Бу хизматларнинг шакли ва сифати ҳозирча кўпчиликка ноъмалум.

Хусусий “Қирғизистон” тижорат банки тарқатган хабарда 2024 йилнинг 16 августидан бошлаб Мбанк воситасида Россия банклари, жумладан Сбербанк, Тинкофф ва МТС орқали пул ўтказмалари ҳар икки йўналишда ҳам тўхтатилгани айтилади. Банк ушбу хизматнинг номаълум муддатга вақтинча тўхтатилганини иддао қилади. Лекин бу муддат қанчага чўзилиши ноъмалум.

“Қирғизистон” банки таклиф қилган МБанк тизими мамлакатда жуда оммавий бўлиб, Қирғизистонда Google Play тизимида энг кўп юкланган беш илова қаторига киради. Бошқача айтганда, аҳолиси сони 7 миллион кишидан иборат Қирғизистонда бу иловани 3 миллиондан ортиқ қўлланувчи юклаб олган.

Бугунги кунда Қирғизистонда савдо дўконлари, турли хил хизмат ширкатлари, коммунал хизматлар, такси ва деярли ҳамма жойда бу тизим орқали пул тўлашни амалга ошириш мумкин. Бунда бир тийин ҳам комиссия олинмайди. Жуда оддий ва қулайлиги сабабли Россиядан пул ўтказишда ҳам бу илова энг кўп қўлланиладиган восита бўлиб қолган эди.

Россия-Украина уруши туфайли ғарб давлатлари Россияга қарши тинимсиз санкциялар киритиб келишади. 2024 йилнинг июн ойида АҚШ ва Буюк Британия Россиянинг бир қатор молиявий тузилмаларига, жумладан, Россия валюта бозорида доллар савдосида воситачилик қилувчи Москва биржаси, Миллий клиринг маркази ва Миллий ҳисоб-китоб депозитарийларига қарши санкциялар жорий этган эди. Шундан сўнг Қирғизистоннинг бир нечта тижорат банклари Россияга ва ундан пул ўтказмалари учун вақтинчалик чекловлар киритишга мажбур бўлишди. Улар қаторида “Қирғизистон” банки ҳам бор.

Мбанк вакиллари ушбу чекловларга сабаб сифатида «курс беқарорлиги ва валюта бозорининг эҳтимолий кескин тебранишларини» кўрсатган. Гўёки мана шу сабабга кўра мижозларнинг рублдаги ҳисобварақлари ва карталарини тўлдириш, пул ўтказиш, конвертация қилиш бўйича чекловлар жорий этилган.

Шу вақтнинг ўзида Қирғизистонда ишлаётган бошқа банклар, улар қаторида “Капитал банк”, “Халқ банки” ва “Осиё банки” вакиллари Россияга ва ундан Қирғизистонга пул ўтказмалари бўйича ҳеч қандай чекловлар йўқлигини билдиришган.

Мбанк Қирғизистоннинг энг бой одамларидан бири, сиёсатда ўз йўлини топа олмай, бир неча бор сиёсатдан четлагани, энди фақат бизнес билан шуғулланишини эълон қилган Ўмирбек Бабановга тегишли. Ҳозирги раҳбарлар ҳокимиятга келгач, чет элда юрган Бабанов бир муддат ватанига келди, лекин яна бир бор сиёсатга аралашмаслигини айтиб, мамлакатдан чиқиб кетган.

Қирғизистонда у ўз хусусий банки, мамлакатда энг йирик ҳисобланган савдо маркази ва бошқа кўчмас мулкларига эга.

Оқбура, Бишкек.

Расм интернетдан олинди

боғлиқ хабарлар

Изоҳ қолдиринг