Давлат ташаббусни қўлга олмоқда: Қирғизистонда автомобиллар суғуртаси энди мажбурий
Суғурта ҳақидаги қонун салкам ўн йил олдин қабул қилинган, лекин амалда қонун ишламай келаётган эди.
Энди Қирғизистонда шахсий автомобилини қайта рўйхатдан ўтказиш пайтида мулк эгалари бошқа ҳужжатлар билан бир қаторда мажбурий суғурта қилингани тўғрисидаги шартномани ҳам тақдим этишлари керак бўлади. Тегишли қарорни Вазирлар маҳкамаси 9 августда қабул қилгани маълум бўлди.
Шуни айтиш керакки, мамлакатда автотранспорт воситалари эгаларининг фуқаролик-ҳуқуқий жавобгарлигини мажбурий суғурта қилиш (ОСАГО) тўғрисидаги қонун қарийб тўққиз йил олдин қабул қилинган. Бироқ, ОСАГО полиси йўқлиги учун жарима санкцияларини жорий этиш муддатлари бир неча бор қолдирилди. Яъни амалда қонун ишламай келган.
Вазирлар маҳкамаси қарорига кўра, жисмоний шахслар 2025 йилнинг 1 январигача уловларини суғуртадан ўтказиб олишлари керак. Аммо юридик шахслар, шу жумладан, давлат органлари ва бошқа давлатларда рўйхатдан ўтган автотранспорт воситалари эгалари ва (ёки) ҳайдовчиларига тегишли бўлган автомобиллар учун мажбурий суғурта ҳақидаги талаб 2023 йил 1 апрелдан кучга кирган.
Бугунги кунда автомобилларни мажбурий суғурта қилиш полисларини расмийлаштириш (бериш) учун 13 компанияга лицензия берилган. Автосуғурта полисининг бошланғич нархи барча компанияларда бир хил бўлиб, 1680 сўмни ташкил этади. Тўлов автомобил турига, ҳайдовчининг ёши ва тажрибасига, шунингдек, ҳайдовчи қанчалик тез-тез йўл ҳаракати ҳодисаларида иштирок этиб туришига қараб ўзгаради. Яъни, кўпроқ автоҳалокатга учраб турадиган ҳайдовчилар учун суғурта тўлови камроқ бўлади.
Оқбура, Бишкек.
Расм интернетдан олинди
