Ҳаддидан ошишди. Москвада Қирғизистон дипломати оиласига қўполлик қилишди
Россия полицияси ходимлари Қирғизистон элчихонаси ходими уйига эшик қулфини бузиб киришган.
Бугун, 12 апрел куни Қирғизистон Ташқи ишлар вазирлигининг консуллик департаментида Россиянинг Қирғизистондаги элчихонаси маслаҳатчи-консули Андрей Бурьев билан учрашув бўлиб ўтди. Унда Москвада Қирғизистон элчихонаси ходимига нисбатан қилинган ноқонуний ҳаракатлар муҳокама қилинган.
Қирғизистон томон Россия полицияси ходимларининг мамлакат элчихонаси ходими ва унинг оиласига нисбатан қилган ҳаракатларидан ташвиш билдирди. Бундай ҳаракатларга йўл қўйиб бўлмаслиги эслатилиб, қисқа вақт ичида вазиятнинг жиддий текшириб чиқилиши ва айбдорларнинг жазоланишини талаб қилди.
Консул Андрей Бурьевой бу масала юзасидан афсусда эканини маълум қилди. Шунингдек у Қирғизистон томондан расмий нота олингани ва бу факт юзасидан текшириш ўтказилаётгани ҳамда унга расмий жавоб берилишини маълум қилди.
Бунгача оммавий ахборот воситаларида пайдо бўлган хабарларга кўра, бир кун аввал Москвада Қирғизистон элчихонаси ходими Манас Жўлдўшбековнинг уйига полиция ходимлари келиб, дипломатнинг ўзи ва оиласи аъзоларининг миграция рўйхатидан ўтишгани тўғрисида ҳужжат талаб қилишган. Унинг уйига полиция ходимлари эшик қулфини бузиб киришгани айтилади. Дипломат ўзининг ва оила аъзоларининг димломатик паспортларини кўрсатгандан кейин ҳам унга қўполлик қилиб, ҳужжат талаб қилишда давом этишган.
Эслатиб ўтамиз, барча мамлакатларнинг элчихоналари ходимлари дахлсизлик мақомига эга бўлиб, уларни на кўчада ва на уйида текшириш, қўлга олиш мумкин эмас. Халқаро ҳуқуқ нормаларига кўра, дипломатларнинг машинасини тўхтатиш, текшириш ҳам ман қилинган. Бирор жиноят ёки ҳуқуқбузарлик содир этилган тақдирда ҳам бу масала тегишли элчихона орқали ҳал қилинади.
Телеграм каналларидан бири жанжал оқибатида димломатнинг аёли тан жароҳати олгани, уларнинг фарзандларига эса жиддий руҳий зарар етказилгани ҳақида ёзган. Лекин бу ҳақда Қирғизистон ТИВ хабарида ҳеч нарса дейилмаган. Қолаверса, бундай ҳолатларда Ташқи ишлар вазирлиги айбдор давлат томонга қаттиқ норозилик билдириб, ҳатто унинг элчисини чақиришгача бориши керак. Бироқ Бишкекда Россия элчихонаси ходими билан учрашув ўтказиш билан чекланишган.
Қирғизистон парламенти депутати Дастан Бекешев ўзининг “Х” саҳифасида Манас Жўлдўшбеков билан боғлангани ва вазият тафсилотлари билан танишганини ёзган.
“Худога шукр, ҳеч ким жабрланмаган, лекин жанжал бўлган. Агар элчихона ходимларига нисбатан шундай иш тутишаётган бўлса, [дипломатик] иммунитетга эга бўлмаган фуқароларга нисбатан қандай нарсаларга боришаётганини тасаввур қиляпман. Чамаси, Россия милицияси қутуриб кетганга ўхшайди”, – деб ёзади депутат.
Маълумки, Москва яқинидаги “Крокус Сити Холл” концерт залида 22 март куни ўтказилган терактдан сўнг Россияда меҳнат муҳожирларига, айниқса Марказий Осиё давлатларидан борган фуқароларга қарши кайфиятлар кучайган. Ҳужум оқибатида 140дан ортиқ одам ҳалок бўлган. Теракт содир этишда тожикистонлик бир гуруҳ фуқаролар қўлга олинган.
Шундан сўнг бутун Россия бўйлаб муҳожирларга қарши полиция рейдлари кучайиб, турли даражадаги рус сиёсатчилари муҳожирлар устидан назоратни кучайтиришга чақирмоқда. Россиядаги шундоғам кўп бўлмаган масжидларни ёпиб ташлаш ҳақида талаблар ҳам янграмоқда.
Бу муносабат билан президент Путин мамлакат аҳолисини, турли миллат вакилларини бирдамликка чақириб, турли иғволарга берилмаслик зарурлиги ҳақида огоҳлантирган. Лекин, афтидан, рус полициясининг ўз қонун-қоидалари бор, шекилли.
Оқбура, Бишкек.
Расм интернетдан олинди
