Россияга бормай туринг! Қирғизистон ҳукумати мамлакат аҳолисига мурожаат қилди
Москвадаги фожиали терактдан сўнг муҳожирларга қарши рейдлар ва ёқимсиз кайфият кучаймоқда.
Қирғизистон Ташқи ишлар вазирлиги мамлакат аҳолисига мурожаат қилиб, жиддий зарурат бўлмаса, Россияга саёҳат қилишдан тийилиб туришга чақирди.
Ташқи ишлар вазирлиги Консуллик бошқармаси бошлиғининг ўринбосари Бақит Қадировнинг “Озодлик” радиосига берган интервьюсида маълум қилинишича, Москвадаги терактдан сўнг Россиянинг бутун ҳудудида хавфсизлик чоралари ва чегара назорати қаттиқ кучайтирилган. Куч органлари олиб бораётган рейдларда муҳожирларга нисбатан муносабат ёмонлашиб, қонунбузарларга қарши энг қаттиқ чоралар кўрилмоқда. Бунинг далили сифатида 24 март куни Ўш,Бишкекдан Москвага учиб келган одатий рейсдаги қирғизистонликларнинг кўпчилиги Россияга киритилмаган ва Шереметъево аэропортидан уйларига қайтарилганини айтиш мумкин.
Бундан ташқари россияликлар орасида ҳам меҳнат муҳожирларига қарши кайфиятлар кучайган. Сайтимизнинг Россиянинг турли шаҳарларидаги манбалари ҳам ана шундай қарши кайфиятларнинг кучайгани, барча шаҳарларда муҳожирларнинг ҳужжатларини текшириш ва уларга қарши қаттиқ чоралар кўриш ҳоллари кучайганини айтишмоқда.
Айниқса, марказий осиёликларга, хусусан Тожикистон фуқароларига қарши ксенофобия ҳуружлари даражаси ортган. Уларга нисбатан қўполлик қилиш одатий ҳол бўлса, айрим ҳолларда ҳужумлар уюштирилмоқда. Масалан, Амур вилоятининг Благовешченск шаҳрида номаълум шахслар муҳожирларга тегишли бўлган дўконга ўт қўйиб кетишган. Шаҳар мэри Олег Имамеев бу ҳужумнинг сабаби этник норозилик экани аниқлигини тан олган. Калуга шаҳрида эса бир гуруҳ рус миллати вакиллари уч нафар тожикистонлик фуқарони калтаклаган. Жабрланганларнинг бири жиддий жароҳатлар билан касалхонага тушган.
Ижтимоий тармоқларда Россиянинг турли минтақаларида маҳаллий мижозлар тожик миллатига мансуб такси ҳайдовчилари хизматидан фойдаланишдан бош тортаётгани ҳақида хабарлар тарқалмоқда.
Бундай вазиятда ўз фуқаролари тақдиридан ташвишга тушган Тожикистоннинг Россиядаги элчихонаси ўз ҳамюртларини уйларидан чиқмай туришга чақиришга мажбур бўлган.
Москва яқинидаги “Крокус сити Холл” концертлар саройига 22 март куни уштирилган ҳужум натижасида ўлганлар сони 140 нафарга яқинлашди. 160дан ортиқ одамлар турли тан жароҳатлари билан касалхоналарга етказилган.
Россия президенти Путин бу террорчилик актини уюштиришда, Россияга қарши урушда радикал исломий кучларнинг қўли билан Россияга зиён етказишга уриняпти дея, АҚШни айблади. АҚШ президенти Жо Байден террорчилик ҳужуми муносабати билан Путинга телефон қилиб, бу терактни қораламаган ва таъзия изҳор қилмаган ягона президент бўлди.
Бундан ташқари, АҚШ расмийлари теракт бўлишидан икки ҳафта олдин Москвада террорчилик хавфи борлиги ҳақида огоҳлантириб, ўз фуқароларини Россия пойтахтида одам кўп йиғиладиган жойларга бормай туришга чақирган эди.
Оқбура, Бишкек.
Расм интернетдан олинди
