Ниҳоят! БМТ Хавфсизлик кенгаши Ғазода ўт очишни тўхтатиш бўйича резолюция қабул қилди
Бунгача ана шундай резолюцияларга уч марта вето қўйган АҚШ ҳукумати бу сафар бетараф қолди.
Бирлашган Миллатлар Ташкилотининг Хавфсизлик кенгаши 25 март куни Фаластиннинг Ғазо ҳудудида ўт очишни зудлик билан тўхтатиш талаби қўйилган резолюцияни қабул қилди.
Ҳужжатнинг яна бир қатъий талаби – барча асирларни дарҳол ва шартларсиз озод қилиш. Резолюциянинг биринчи қисми асосан Ғазода тинч аҳолини қатлиом қилаётган Исроилга дахлдор бўлса, асирларни озод қилиш талаби ҳамон 100 нафардан ортиқ исроилликни гаровда ушлаб турган ҲАМАС ташкилотига тегишли.
Қатор уринишлардан сўнг қабул қилинган резолюцияда томонлардан Рамазон ойининг қолган кунлари мобайнида, яъни 9 апрелгача ўт очишни тўхтатиш ва Ғазога келаётган инсонийлик ёрдамларининг тўсиқсиз етказилишини таъминлаш талаб қилинади. Ёрдамнинг келишига тўсқинлик қилмаслик ҳам Исроилга тегишли бўлиб, у турли важ-карсон билан озиқ-овқат, дори-дармон ортилган юзлаб машиналарни чегарадан ўтказмаяпти. Натижада Ғазода истиқомат қилувчи икки миллиондан ортиқ аҳоли очарчилик хавфи остида қоляпти. Юз минглаб одамлар эса уруш бошлангандан бери овқат ва сув етишмаслигидан азият чекмоқда.
Қассобга ёғ қайғу…
Эслатиб ўтамиз, БМТ Хавфсизлик кенгаши Ғазода уруш бошланганидан бери ўт очишни тўхтатиш бўйича қарор қабул қила олмаётган эди. Бунга асосан Исроилнинг доимий раҳнамоси бўлган АҚШ айбдор бўлиб, у бунгача таклиф қилинган уч резолюцияга вето қўйган. Лекин кейинги пайтларда Исроил тинч аҳолини қирғин қилишнинг олдини олиш бўйича дунё ҳамжамияти ва ўзининг ҳомийси АҚШнинг талабларини ҳам инкор қила бошлади. Шундан сўнг Америка президенти Жо Байден Исроил бош вазири Бинямин Натаняхуга қаттиқ дакки беришга мажбур бўлди. Чунки Исроил ҳукуматининг ўзбошимчалик билан бутун халқаро ҳуқуқ қоидаларини қўпол равишда бузаётгани нафақат яҳудийлар мамлакати, балки уни қўллаб-қувватлаётган АҚШнинг ҳам халқаро нуфузига жиддий путур етказа бошлади. Шу сабабдан бу сафар АҚШ овоз беришда бетараф қолди.
Шуни айтиш керакки, АҚШнинг ўзи ҳам Хавфсизлик кенгашига Ғазода ўт очишни тўхтатиш бўйича резолюция лойиҳасини киритган, лекин унга Россия ва Хитой вето қўйганди. Бунгача АҚШ ҳам Россия таклиф қилган ана шундай ҳужжатни рад этган. Яъни, йирик давлатлар шу ерда ҳам ўз манфаатлари йўлида кураш олиб боришмоқда.
Бунгача бош вазир Натаняху Исроилнинг халқаро ҳамжамиятнинг талабларини писанд қилмаслиги, нима бўлганда ҳам Исроил урушни давом эттираверишини бир неча бор айтган. Унинг мақсади – ҲАМАС ташкилотини бутунлай йўқ қилиш. Лекин бу мақсаднинг амалга ошиши мумкин эмаслигини барча давлатлар раҳбарлари ва мутахассислар эътироф этишмоқда. Исроил эса бу урушда шармандаларча енгилганини тан олгиси келмай, ҳамон ўжарлик қилмоқда.
Ўт очишни тўхтатиш бўйича резолюция қабул қилингач, АҚШ ҳукумати Исроил ҳукумати вакиллари билан “Оқ уйда” ўтиши режалаштирилган музокараларни бекор қилганини маълум қилди. Бу 70 йилдан ортиқроқ давом этиб келаётган Исроил босқинининг тугатилиши сари қўйилган биринчи жиддий қадам бўлди.
Албатта, АҚШга қолса, ўзининг севимли боласидек кўрадиган Исроилни қўллашда давом этган бўларди. Лекин нафақат халқаро ҳамжамият, балки Американинг ўзида ҳам президент Байденнинг бу сиёсатига қарши норозилик тобора кучайиб бормоқда. Бу эса ноябр ойида ўтадиган президент сайловида иштирок этиш истагини билдирган Жо Байден учун жиддий хавф туғдиради. Америкада яшовчи мусулмонларгина эмас, миллионлаб бошқа дин вакиллари ҳам Ғазодаги қирғинни тўхтатиш талаби билан намойишларга чиқшмоқда.
Ғазо ҳудуди ҳукуматининг Соғлиқни сақлаш вазирлиги уруш бошланганидан бери 31 мингдан кўпроқ фаластинлик аҳолининг ҳалок бўлганини маълум қилди. Уларнинг учдан икки қисмини аёллар ва болалар ташкил этиши айтилмоқда.
Оқбура, Бишкек.
Расм интернетдан олинди
