Миллий хавфсизлик давлат қўмитаси раиси Футбол федерациясиниям бошқаради
Қирғизистон хавфсизлик хизмати бошлиғи Қамчибек Ташиев зиммасига яна бир вазифа юкланди.
Қирғизистон футбол иттифоқининг (ҚФИ, федерация ўрнида) 19 февраль куни Бишкекда бўлиб ўтган навбатдан ташқари конгрессида Қамчибек Ташиев бир овоздан иттифоқ президенти этиб сайланди. Унинг ваколати 2026 йилгача давом этади.
Ташиев бугунги кунда иккита расмий лавозимни эгаллайди. У 2020 йилдан буён Миллий хавфсизлик давлат қўмитасини бошқариб келаётган бўлса, 2021 йилдан буён Бош вазир ўринбосари сифатида ҳам фаолият юрита бошлади. Бунинг натижасида у мамлакат иқтисоди ва ижтимоий соҳаларига ҳам фаол таъсир кўрсата олади.
Жумладан, Ташиев уюшган ва иқтисодий жиноятлар, солиқ ва божхона тизимидаги коррупция кабиларда жиддий иш олиб бормоқда. Яқинда у оилавий зўравонликдан жабр тортган аёлларга мурожаат қилиб, уларга қўллов кўрсатишни ваъда қилди.
Футбол иттифоқига раҳбарлик қилишни унга президент Садир Жапаров таклиф қилган эди. Бу Қирғизистон миллий терма жамоасининг Қатарда бўлиб ўтаётган Осиё кубогининг саралаш ўйинларида катта талафот кўриб келганидан кейин содир бўлди.
Ўшанда Қирғизистон терма командаси ўз гуруҳида учта ўйин ўтказиб, атиги битта гол уришга муваффақ бўлган ва кейинги даврага чиқишдан маҳрум бўлган. Шундан сўнг Қирғизистон Футбол иттифоқи президенти Медербек Сидиқов истеъфо берган эди.
Ашаддий футбол ишқибозигина эмас, яхшигина футболчи ҳам эканини кўрсатган президент Жапаровнинг фикрича, ҚФИга ишни қаттиқ назорат қила оладиган одам раҳбарлик қилмаса, мамлакат футболи яхши натижаларга эришиши мушкул. Ташиев ҳам Жапаров билан бирга терма команданинг Бишкекда ўтказган ҳар бир ўйинига бориб, футболчиларни қўллаб туради.
Ташкилот президентлигига сайлангач, Қамчибек Ташиев ишни биринчи навбатда кадрлар, яъни, мураббийлар, ҳакамлар ва бошқа мутахассислар билан боғлиқ муаммоларни ҳал қилишдан бошлашини маълум қилди.
Сўнгра Футбол иттифоқининг янги президенти Халқаро Футбол ассоциацияси (FIFA) вакиллари билан учрашди. FIFAнинг минтақавий ассоциацияларни ривожлантириш бўйича менежери Андрей Вашкевич ва ташкилотнинг бошқарув хизмати бош менежери Аҳмед Харраз Ташиевни янги лавозим билан қутлашди.
Томонлар Қирғизистонда футболни ривожлантириш билан боғлиқ масалаларни муҳокама қилишди.
Кейинроқ брифинг ўтказган Ташиев Миллий терма команда аъзоларини танлаш принципи ўзгаришини маълум қилди. Унинг фикрича, терма командада энг яхши ва садоқатли спортчилар бўлиши лозим. Шу сабабли ҳар бир номзод ҳар тарафлама текширилади ва сўнг терма жамоага қабул қилинади.
Шунингдек, Ташиев Бишкекда икки йилда янги стадион қурилишини айтган. Бу масала икки-уч йилдан бери айтилиб, турли гап-сўзларга сабаб бўлиб келаётган эди.
Оқбура, Бишкек.
Расм интернетдан олинди
