Жаҳон автомобил бозори: «Шевролет» учинчи бўлса, Ўзбекистон иккинчи ўринда
Автомобил ишқибозлари орасида Ўзбекистон машиналарига талаб кучайиб бормоқда.
Жаҳондаги автомобил ишлаб чиқарувчи давлатлар орасида мустаҳкам ўринга эга бўлган Ўзбекистон 2023 йилда Chevrolet маркасининг жаҳон савдоси рейтингида иккинчи ўринни эгаллади.
«Ўзавтосаноат» ва «Ўзавтомоторс» компанияларининг ахборот хизматлари тарқатган хабарга кўра, бунга сабаб – мамлакатда сўнгги бир неча йилда ишлаб чиқарилаётган автомобил маркаларига бўлган талаб юқори экани бўлган.
АҚШ 1,7 миллион дона ушбу русумдаги автомобилларни сотиб, жаҳоннинг энг оммабоп автомобилларидан бўлган Chevrolet маркасининг сотуви бўйича жаҳон рейтингида биринчиликни эгаллаган. Ўзбекистон 370 мингта Chevrolet бренди остидаги автомобил сотиб, иккинчиликни олган.
Мазкур маркадаги машиналар сотувида Бразилия учинчи (327 минг 781 та), Мексика тўртинчи ўринни олган бўлса (172 мингдан кўпроқ), Хитой (169 мингга яқин) бешталикнинг охирги поғонасини эгаллаган.
Аввалроқ Ўзбекистонда 2023 йилда ишлаб чиқарилган енгил автомобилларнинг 118 093 донаси Cobalt ҳиссасига тўғри келгани ва бу бошқа русумлар ичида энг кўп миқдор экани хабар қилинган. Ҳаттоки 2024 йилда ишлаб чиқариш режалаштирилган ушбу русумдаги автомобиллар аллақачон сотилиб бўлган.
Оммавийлиги бўйича кейинги ўринларда бораётган Damas (89 154 дона) ва Gentra (82 133 дона) русумлари бошқа русумларга нисбатан кўпроқ ишлаб чиқарилган. Жумладан, компания ўтган йили 48 082 дона Tracker, 30 596 дона Chevrolet Onix автомобилларини ишлаб чиқарган.
Жаҳон автомобил савдоси бозорида бугун харидорларнинг қониқиш ҳосил қилиши бўйича АҚШнинг Buick (биринчи), Dobge (иккинчи) ва Shevrolet (учинчи) русумли автомобиллари пешқадамлик қилишмоқда. Ундан кейин Кореянинг Genesis ва Kia маркалари бормоқда. Япониянинг Lexsus бренди фақат олтинчи ўринни эгаллаган.
Американинг Hedges & Company маркетинг агентлиги тарқатган маълумотга кўра, 2023 йилнинг охирига келиб, дунё мамлакатлари йўлларида юрган автомобиллар сони 1,47 миллиард донага етган.
Марказий Осиё минтақасида Қирғизистон жон бошига ҳисоблаганда энг автомобили кўп давлат ҳисобланади. Бу ерда 7 миллиондан ортиқ аҳолида 1 миллион 387 мингдан ортиқ автомобил рўйхатга олинган. Яъни, ҳар бир беш кишига битта машина тўғри келади.
Ўзининг йирик автомобил саноатига эга бўлган Ўзбекистонда эса 36 миллион кишилик аҳолига 2 миллион 768 мингга яқин автомобил хизмат қилади. Бошқача айтганда ҳар 12,5 кишига битта машина тўғри келади.
Ўтган йили икки давлат ўртасида имзоланган келишувга кўра, Қирғизистонда ҳам яқин орада ўзбекистонлик автосаноатчилар кўмагида бир неча русумдаги автомобиллар ишлаб чиқарила бошлайди.
Оқбура, Бишкек.
Расм интернетдан олинди
