Бир сотих ҳам ери қолмайди. “Райим миллион”нинг мулки тўла мусодара қилинади
Афтидан собиқ божхона раиси миллиардер ўринбосарининг “олтин даври” энди тўла тарихга айланади.
Қирғизистон Миллий хавфсизлик давлат қўмитасининг раиси Қамчибек Ташиев мамлакатда “Райим миллион” лақаби билан донг таратган ишбилармон, давлат Божхонаси раиси ўринбосари Райимбек Матраимов ҳақида яна бир шов-шувли баёнот берди.
Мамлакат жанубида, Қирғизистон ва Ўзбекистон чегарасида жойлашган машҳур Қорасув бозори савдогарлари билан учрашувда Ташиев Матраимовнинг қидирувга берилганини маълум қилди.
“Унинг барча мол-мулкини давлат ҳисобига оламиз. Матраимовга бир сотих ер ҳам қолдирмаймиз. У энди оддий одам бўлади, “Райим миллион” бўлмайди”, – деди Қамчибек Ташиев.
Ташиев Матраимовнинг бошқаларга ўхшаб Қорасув бозорида бир нуқта (дўкон) олиб, ўз эҳтиёжларини таъминлаши мумкин. Шунингдек у Матраимовлар тўдасини йўқ қилиш учун Ўш вилоятида ўнлаб амалдорларни ишдан бўшатишга тўғри келганини ҳам эслатди. Аввал берилган расмий хабарларга кўра, Матраимовга алоқадор деб ҳисобланган 200 га яқин ходим ва раҳбарлар Божхона ва солиқ хизматидан ҳайдалган.
«Райим миллион» лақаби билан танилган, 52 ёшли Райимбек Матраимов 1997 йилдан Божхона тизимида ишлаб келган. 2007-15 йилларда Давлат божхона хизматининг аввал Ўш вилояти бошқармаси бошлиғи, кейин Жанубий бошқармаси бошлиғи бўлиб ишлаган. 2015-2017 йилларда эса Давлат Божхона хизмати раисининг ўринбосари даражасида фаолият юритган.
Унинг битмас-туганмас бойликлари ҳақидаги миш-мишлар кўпайиб, бирин-кетин унинг номи билан боғлиқ турли ғавғолар бошлангач, 2017 йили ўша пайтдаги президент Алмазбек Атамбаев уни ишдан бўшатган. Кейин сиёсатга аралашиб, парламент сайловларида иштирок этган ва парламентда анча ўрин олишга эришган. Лекин халқ норозилиги туфайли сайлов натижалари бекор қилиниб, охир-оқибатда Матраимовни дўст тутган президент Сўўрўнбай Жеенбеков лавозимидан кетган.
“Озодлик”, “Клооп” ва Уюшган жиноятчилик ва коррупцияни тадқиқот қилиш маркази (OCCRP) бирга ўтказган суриштирув хулосаларида Матраимов Хитойдан Қирғизистонга келадиган юкларни тўла назорат қилувчи асосий шахс бўлгани айтилади. Катта шов-шувдан сўнг у 2020 йилнинг октябрида Қирғизистон божхонасида коррупцион схемаларни ташкил этишда айбланиб, қўлга олинган.
Райимбек Матраимов тергов билан ҳамкорлик қилган бўлиб, бюжетга бир қисми нақд, бир қисми мулк шаклида 2 миллиард сўм (салкам 22,5 миллион АҚШ доллари) зарарни қоплаб берган. Судда ўз айбига иқрор бўлиб, 260 минг сўм жарима ҳам тўлаган. Шунда расман уни жиноий таъқиб қилиш тўхтатилган. Лекин кейинроқ Қамчибек Ташиев Матраимовнинг яна аввалги жиноий ишларини давом эттираётганини ва энди унга қарши шафқат қилинмаслигини айтиб чиққан.
Шундан сўнг Матраимовнинг аввал Туркияга, кейин Бирлашган Араб Амирликларига чиқиб кетганлиги ҳақида хабар тарқалган. “Kaktus.media” нашрининг маълум қилишича, у давлат бюжетига яна бир неча юз миллион сўм қайтаришга ваъда берган, бироқ уни бажармасдан қочиб қолган.
Қамчибек Ташиев савдогарлар билан учрашув чоғида Қорасув бозорининг давлат ҳисобига мусодара қилинишини ҳам маълум қилган. Бу хабарни йиғилганлар қувончли қарсаклар билан қарши олишган. Бунгача Ташиев бозор эгаларининг савдогарлардан ортиқча ва асоссиз, ноқонуний пул йиғиб олаётганликда айблаган, одамлардан эса тегишли аризалар тушган эди. Шунингдек Ташиевнинг талаби билан мамлакатдаги барча йирик бозорлар савдогарлардан олинадиган ижара ҳаққини икки баробар камайтиришган ва бошқа турли асоссиз йиғимлар бекор қилинган.
Оқбура, Бишкек.
Расм интернетдан олинди
