Қирғиз парламенти депутати давлат раҳбарларини йўқ қилишда четдан ёрдам сўраган
Тошкентда “Салимбой” билан учрашган депутат Эмил Жамғирчиевга жуда жиддий айбловлар қўйилмоқда.
Қирғизистон президенти Садир Жапаров Жўғорқу Кенеш депутати Эмил Жамғирчиевнинг ўзбекистонлик «Салимбой» номи билан машҳур бўлган Салим Абдувалиевдан Қирғизистондаги “икки дўстни йўқ қилишда ёрдам” сўрагани ҳақида баён қилди. Қирғизистонда “икки дўст” деганда президент Садир Жапаров ва Миллий хавфсизлик давлат қўмитаси (МХДҚ) раиси Қамчибек Ташиев назарда тутилади. Ташиев бир вақтнинг ўзида Вазирлар маҳкамаси раисининг ўринбосари ҳам бўлиб, мамлакатдаги ҳуқуқ-тартибот органлари ишини назорат қилади.
Садир Жапаров ўзининг «Кабар» миллий ахборот агентлигига берган анъанавий интервьюсида, “Менга тақдим этилган маълумотларга кўра, у [Эмил Жамғирчиев] Қирғизистон-Ўзбекистон давлат чегарасини ноқонуний кесиб ўтиб, «Салимбой» лақабли криминал авторитет Салим Абдувалиев билан учрашиб, “икки дўстни” йўқ қилишда ёрдам сўраган”, деди.
Бунгача МХДҚ депутатнинг давлат чегарасини ноқонуий кесиб ўтишда айбланаётгани, бу айблов бўйича унинг қамалмаслигини, бор-йўғи жарима ёки жасмоат ишларига тортиш билан жазоланиши мумкинлигини айтиб чиққан. Лекин депутат унга терговга чақириқ қоғозини олиб келган мулозимлардан қочиб кетган эди. Бир неча кун ўтгач, унинг терговга келиб, кўрсатмалар бериб чиққандан кейин қўйиб юборилди.
Қирғизистон парламенти 10 январда 69 овоз билан депутат Эмил Жамғирчиевни жиноий жавобгарликка тортишга рухсат берганди. Ўшанда Жамғирчиев бўйича тузилган депутатлар комиссияси раиси Алишер Эрбаев Эмил Жамғирчиевнинг 2022 йилда Салим Абдувалиев билан учрашиш ва ундан қўллов олиш мақсадида Қирғизистон-Ўзбекистон чегарасидан яширинча ўтганини билдирди.
Эмил Жамғирчиев қочиб кетгач, унга нисбатан янги, жумладан юқорида айтилган айбловлар тилга олина бошлади. Депутатнинг ўзи бу айбловларни рад этиб келмоқда. “Озодлик” радиосининг қирғиз хизматига берган интервьюсида у парламентнинг 17 январга белгиланган йиғилишида бу ҳақда батафсил маълумот бериш ниятида эканини айтган.
Тошкентлик Салим Абдувалиевга мурожаат қилгани борасидаги саволга депутат бу ҳақида ҳеч ҳеч нарса билмаслигини айтган. Жамғирчиев билганларини махсус депутатлар комиссияси йиғилишида айтганини ва бу ишнинг бир йилдан бери чўзилиб келаётганини маълум қилган.
Жамғирчиев унга қарши жиноий ишни депутат сифатида Кампиробод сув омбори бўйича Ўзбекистон билан келишувга қарши овоз берганидан кейин қайта очилганини айтмоқда.
Нима бўлганда ҳам нафақат махсус хизмат, балки давлат раҳбари томонидан айтилган бундай айбловларнинг оқибати жиддий бўлиши ўз-ўзидан аён.
Оқбура, Бишкек.
Расм интернетдан олинди
