Ечим янада яқин: Қирғизистон-Тожикистон чегарасининг яна бир қисми аниқланди
Икки давлат расмийлари баҳоргача чегаранинг тўлалигича аниқланиб бўлишини айтишган.
Қирғизистон-Тожикистон давлат чегарасининг яна 40 километрга яқин бўлаги бўйича ўзаро келишувга эришилди. Тожикистоннинг «Ховар» ахборот агентлиги берган хабарга кўра, бу ҳақдаги келишувни имзолаш Қирғизистоннинг Боткен шаҳрида икки давлат топографларининг биргаликдаги меҳнатлари натижасида мумкин бўлди.
Аввалдан қабул қилинган қоидага кўра, навбатдаги учрашув энди Тожикистон ҳудудида ўтказилади.
Ўтган йилнинг декабрида Боткен шаҳрида бўлиб ўтган чегараси бўйича ҳукумат вакиллари икки давлат миллий хавфсизлик идоралари раҳбарлари Қамчибек Ташиев ва Саймўмин Ятимовлар етакчилигида учрашишган. Делегация раҳбарлари ўшанда қўшма баёнот беришиб, бу учрашув натижасида томонлар чегаранинг яна 120 км қисми борасида келишувга эришганларини маълум қилишган.
Ўшанда икки давлат ўртасидаги чегаранинг 90% борасида англашувга эришилгани, қолган 10% ҳудуд бўйича масала эса баҳоргача ҳал этилиши иддао қилинган. Шу вақтнинг ўзида икки давлат ўртасидаги чегарани аниқлаш масаласи жуда оғир кечаётганини ҳар икки томон тан олиб келган.
Эслатиб ўтамиз, Қирғизистон-Тожикистон чегарасининг умумий узунлиги 970-980 километрни ташкил қилиб, 2022 йилгача унинг 664 километри бўйича келишувга эришилган. Бунгача, 2021 йил ёзи ва 2022 йилнинг кузида икки давлат чегарачилари ва аҳоли ўртасида бўлиб ўтган қисқа муддатли қуролли тўқнашувларда ҳар икки томондан ўнлаб киши ҳалок бўлган.
Икки давлат ўртасидаги зиддият кучайиб кетган бир пайтда Қирғизистон президенти Садир Жапаров масалага вазминлик ва эҳтиросларсиз ёндашиб, президент Имомали Раҳмон билан учрашиш учун Душанба шаҳрига борган. Жапаровнинг бу қадамини икки давлат ўртасидаги тенгликни сақлаш учун учрашув холис ҳудудда ўтказилиши керак деб ҳисоблаган кучлар танқид остига олишган.
Бу ҳақда Садир Жапаров катта йиғинлардан бирида айтиб, мамлакат суверенитетини ва халқ тинчлигини сақлаш учун қўлидан келган барча ишларни қилишини таъкидлаб ўтган.
Оқбура, Бишкек.
Расм интернетдан олинди
