Ана холос! Жўғўрқу Кенеш депутати ўзбекистонлик Салимбойваччадан ёрдам сўраган
Парламент депутати Эмил Жамғирчиев иккинчи қаватдаги деразадан сакраб қочиб кетди (видео)
@ulandhumak Демутат ЖК Эмиль Жамгырчиев спрыгнул с окна второго этажа и убежал 🏃🏻♂️ #эмильжамгырчиев #жогоркукенеш #кыргызстан ♬ оригинальный звук – Меруерт
Жўғўрқу Кенеш мажлисида айтилишича, депутат Эмил Жамғирчиев “Салимбойвачча” лақаби билан танилган Ўзбекистон фуқароси Салим Абдувалиев билан учрашиш ва ёрдам олиш мақсадида Қирғизистон чегарасини ноқонуний кесиб ўтган. Бу ҳақда депутатлар комиссияси раиси, депутат Алишер Эрбаев Жўғўрқу Кенешда комиссия хулосасини ўқиб берганда маълум бўлди.
“Эмил Жамғирчиев юқори мартабали сиёсий давлат амалдори бўла туриб, Марказий Осиёда таниқли Салим Абдувалиев билан яширин учрашиш мақсадида 2022 йил декабр ойида Қирғизистон чегарасини ноқонуний кесиб ўтиб, Тошкентга, Ўзбекистонга борган. Учрашувдан сўнг Жамғирчиев 2022 йил 16 декабр куни қонунда белгиланган тартибда чегарани кесиб ўтмасдан, яна Ўзбекистондан Қирғизистонга ноқонуний равишда ўтган ва чегарани ноқонуний кесиб ўтиш фактини яшириш мақсадида Бишкек шаҳрига келган”, – деди Эрбаев.
Унинг қўшимча қилишича, бу ҳолат юзасидан Жамғирчиевга нисбатан Ўзбекистонда ҳам жиноий иш қўзғатилган. Унга кўра, Бош прокуратура буни исботлаб, комиссия аъзоларини ишонтирган. Бироқ, Эрбаев бу жиддий модда эмаслигини, бу ҳуқуқбузарлик учун 2 йилгача қамоқ ёки 50-100 минг сўм жарима кўзда тутилганини қўшимча қилди.
Депутатнинг савиясини кўринг
Бу маълумотларни Миллий хавфсизлик давлат қўмитаси (МХДҚ) раиси Қамчибек Ташиев ҳам тасдиқлади. У Эмил Жамғирчиевнинг Салим Абдувалиевдан ёрдам сўраб ёзган мактубининг айрим қисмларини депутатларга ўқиб берди.
“Мана, у нима деб мурожаат қилмоқда. “Салимбой ака, Салимбой ака, ҳурматли Салимбой ака, ҳамма жойни кўриб турибсиз, ҳамма нарсани ушлаб турасиз. Биз ҳаммамиз, Ўрта Осиёга бўйсунамиз. Салимбой ака, Қирғизистон мустақиллигининг 30 йили ичида президент бўлган: Ақаев, Бакиев, Ўтунбаева, Атамбаев, Жеенбеков ва ҳозирги президент Жапаровлар сизнинг оқ кўнгиллилигингиз, дунёқарашингиз, қадр-қимматингизни қадрлашди ва президентлик тахтига келганида, албатта, дуоларингизни олишди”, деб ёзмоқда. Шармандалик бу! Ким президент бўлишидан қатъий назар жиноий авторитетлардан дуо олмаган. Олмайди ҳам. У яна шундай дейди: «Мен ҳам сизнинг халқаро обрў-эътиборингизни юқори даржада ҳис қиламан ва Яратганнинг розилиги учун менга ёрдам беришингизни сўрайман”, – дейди. Яна унинг сўраган нарсасидан бири – “Ташиевни жавобгарликка тортиб беринглар”, – дейди. Мана унинг мактуби. Бу хат сохта эмас. Орангизда шундайлар депутат бўлиб ўтирибди. Ўшанда ҳам биз унга бошқа модда қўймадик. Биз бу жиҳатни унинг маънавий жавобгарлигига қолдирмоқчимиз. Биз у фақат чегарани ноқонуний кесиб ўтгани учун жавоб беришини истаймиз”, – деди Қамчибек Ташиев.
Бундан ташқари Ташиевнинг таъкидлашича, Жамғирчиевнинг маслаҳатчиси парламент ҳужжатларини Тошкентга юборган. Махсус хизмат раҳбари “чегарани ноқонуний кесиб ўтишда айбланган Қирғизистон фуқаролари ҳибсга олинмаслигини” маълум қилди ва агар иш судга етиб борса, Эмил Жамғирчиевга судга келишни таклиф қилди.
Кеча, 10 январ куни Жўғўрқу Кенеш парламентнинг “Альянс” фракцияси аъзоси Эмил Жамғирчиевни жиноий жавобгарликка тортишга рухсат берди. Тегишли қарор лойиҳасига 69 депутат “ҳа” деб овоз берди.
Жамғирчиевга нисбатан “чегарани ноқонуний кесиб ўтиш” моддаси бўйича жиноят иши қўзғатилган. Кеча депутатнинг қочиб кетгани ҳақида хабар таради. Унинг ҳозир қаерда экани номаълум. Буни қисман тасдиқловчи видео интернетда тарқади.
Маълум қилинишича, ўша куни Миллий хавфсизлик қўмитаси ходимлари депутатга чақирув қоғози бермоқчи бўлишганида, у ҳамкасби Нилуфар Алимжанованинг 2-қаватдаги кабинетига кириб, унинг деразадан сакраб тушган.
Қирғизистон Конституциясининг 78 моддасига кўра, Жўғўрқу Кенеш депутати ўз фаолияти билан боғлиқ фикр билдиргани ёки овоз бергани учун жиноий жавобгарликка тортилмайди. Халқ вакили фақат парламент аъзоларининг кўпчилик овози (розилиги) билан жавобгарликка тортилади. Жиноят содир этаётган пайтда ушланган ҳоллар бундан мустасно.
Бу биринчи жиноий иш эмас
Эмил Жамғирчиевга нисбатан аввал ҳам жиноий иш қўзғатилган. Ўша пайтда у амалдор эди. Яъни, 2019 йилда «Лавозимни суиистеъмол қилиш», «Пора олиш» ва «Товламачилик» моддалари бўйича қўзғатилган.
Хитойдан ўрдак гўштини контрабанда йўли билан олиб келишда айбланган хусусий тадбиркор Эмир Эмилқанов жиноят ишни ёпиш учун ҳукумат аппарати раҳбарининг собиқ ўринбосари Бақтибек Қалмуратов орқали Жамғирчиевга катта миқдорда пора берганини айтган. Иш ёпилмаган, Эмилқанов Жамғирчиев ва Қалмуратовлар устидан Миллий хавфсизлик давлат қўмитасига ариза ёзган. Жамғирчиев тадбиркорнинг айтганларини «туҳмат» деб атаган.
Шу аснода 2020 йил октябр ойида Жамғирчиев ва Қалмуратов «Пора олиш»да гумон қилиниб, қўлга олинишган ва МХДҚнинг тергов изоляторига киргизилган. Бироқ 2021 йилнинг февралида Жамғирчиев уй қамоғига чиқарилган. Икки ойдан кейин Қалмуратов ҳам уй қамоғига чиққан.
Кейинроқ Эмилқанов судланувчиларнинг 27 минг доллар товон тўлагани ва уларга қарши даъвоси йўқлигини айтган. Шу билан бирга, Жамғирчиев ҳеч қандай пул тўламаганини таъкидлаган.
Кейинроқ Бишкекнинг Биринчи май туман суди бу иш бўйича Жамғирчиев ва Қалмуратовни оқлаган, Қалмуратовга қўйилган яна бир айбловни «Фирибгарлик» моддасига ўзгартириб, жабрланувчининг даъвоси йўқлиги сабабли ишни тўхтатган.
Кейинчалик Жамғирчиев «Альянс» партиясидан парламент сайловларида қатнашиб, 2022 йилнинг мартидан бошлаб Жўғўрқу Кенеш депутати бўлиб ишлаб келаяпти.
Оқбура, Бишкек.
Расм видео интернетдан олинди
