Ким учрашди? Парламент делегациясининг Беларусга ташрифи саволлар туғдирди
Қирғизистон парламенти спикерининг собиқ президент Бакиев билан учрашгани рад этилди.
Қирғизистон парламенти спикери Нурланбек Шакиевнинг Беларусга қилган расмий ташрифи давомида мамлакатнинг собиқ президенти Қурманбек Бакиев билан учрашгани ҳақидаги маълумотни спикернинг матбуот котиби Алтинбек Деркембаев “Озодлик” радиоси билан суҳбатда рад этди.
“Раҳбарларнинг расмий ташриф дастури олдиндан тузилади, унда икки давлат протокол хизматлари ҳамкорликда ишлайди, барча учрашувлар ошкора ўтказилади. Спикерга кўпчилик ҳамроҳлик қилди, мендан бошқа элчихона ходимлари ҳам учрашувларда қатнашишди. Қурманбек Бакиев билан ҳеч қандай учрашув бўлмаган”, – деди Деркембаев.
Ўтган ҳафта парламент раиси Нурланбек Шакиев бошчилигидаги парламент делегацияси Минскда Беларус раҳбарияти билан учрашувлар ўтказиб қайтган эди. Шундан сўнг интернет манбаларида Шакиев ва депутатлар Элмурза Сатибалдиев ва Бақтибек Сидиқовларнинг у ерда Қирғизистоннинг собиқ президенти Қурманбек Бакиев билан учрашгани ҳақида маълумот тарқалди.
Бундай учрашув бўлганини депутат Бақтибек Сидиқов ҳам инкор қилди. Унинг айтишича, бундай ташрифлар чоғида шахсий учрашувларга вақт бўлмайди, спикер эса ҳатто “ҳожатга ҳам протокол асосида бора олади”.
Собиқ президент билан учрашганини биргина депутат, “Ата-Журт – Қирғизстан” фракцияси раҳбари Эльмурза Сатибалдиев тан олди.
“У менинг президентим бўлган, мен унинг даврида ишлаганман. Бу шунчаки инсонийлик муносабатлари. Уни бир кўриб, ҳол-аҳвол сўрашдик, холос. Сиёсат эмас, турмуш ишлари ҳақида гаплашдик”, деди журналистлар билан суҳбатда.
Дарҳақиқат, Эльмурза Сатибалдиев Бакиев даврида бош прокурор лавозимида ишлаган. Спикер Нурланбек Шакиев эса маълум вақт Бакиевнинг матбуот котиби бўлиб турган.
Эслатиб ўтамиз, Қурманбек Бакиев ва унинг тўнғич ўғли Марат Бакиев Қирғизистондаги 2010 йилнинг апрелидаги давлат тўнтаришидан сўнг сиртдан 30 йиллик қамоқ жазосига ҳукм қилинган. Унинг кичик ўғли Маратга ҳам жиноий иш қўзғалиб, халқаро қидирувга берилган. Собиқ президентнинг укаси, собиқ давлат қўриқлаш хизмати раҳбари Жаниш Бакиев сиртдан умрбод қамоқ жазосига ҳукм қилинган.
Қурманбек Бакиевнинг оиласи ва қолган укалари билан Минскда яшаши айтилади, Максим эса Англияда истиқомат қилади. Уларни суд қилиш учун ватанига қайтариш бўйича сўровини Минск ва Лондон рад қилиб келади. Бакиевларни мамлакат аҳолисининг бир қисми ҳамон қўллаб-қувватлайди, бошқа бир қисми уни ашаддий жиноятчи сифатида юртига олиб келиб жазолашни талаб қилиб келади.
Парламент депутатлари ва катта амалдорлар орасида ҳам Қурманбек Бакиев билан турли лавозимларда бирга ишлаган, шу пайтгача унга қарши бирор ёмон гап айтмаган сиёсатчилар кўп. Улар сиёсий вазиятни ҳисобга олган ҳолда ўзларининг собиқ президентга нисбатан муносабатлари ҳақида ошкора гапирмайдилар.
Оқбура, Бишкек.
Расм интернетдан олинди
