Ўзимизга керак: Қирғизистон ем-ҳашак ва дон маҳсулотлари экспортини таъқиқлади
Ёзнинг қурғоқ келиши туфайли ем-хашак маҳсулотлари заҳираси бу йил анча кам бўлди.
Қирғизистон Вазирлар маҳкамаси ем-хашак ва бир қатор дон маҳсулотларини ҳориж мамлакатларига сотишни тақиқлади. Қишлоқ хўжалиги вазирлиги бу мораторийнинг олти ойга киритилганини маълум қилди.
Экспорт қилиш тақиқланган дон маҳсулотларига гуруч, арпа, жўхори ва ем-хашакнинг барча тури (пичан, сомон, омухта ем, кепак ва дон еми) киради. Шу вақтнинг бу маҳсулотларни реэкспорт қилиш, транзит қилиш мумкин. Вазирлар маҳкамаси эса уларни инсонийлик ёрдами сифатида четга чиқариши мумкин. Бу ёрдам кўлами қанча бўлишини вазирлик кўрсатмаган.
Йилнинг қурғоқ келиши оқибатида Қирғизистон қишлоқ хўжалигида жиддий вазият юзага келган. Шу сабабли июль ойининг охирида Қишлоқ хўжалиги вазирлиги ҳукуматга ем-ҳашак маҳсулотларини ташқи бозорларга экспорт қилишни чеклаш бўйича чора-тадбирлар қабул қилишни тавсия қилган эди.
Вазирлик вакили Асқарбек Жанибековнинг сўзларига кўра, жорий йилда емнинг заҳира ҳажми талабдагидан 30 фоиз камроқни ташкил қилган. Унинг айтишича, худди шундай мораторий ўтган йили ҳам жорий қилинган бўлиб, тегишли вазирликлар аксинча, Қирғизистонга ем-ҳашак олиб кириш учун имтиёзлар жорий этган.
Аввалроқ қирғиз чорвадорлари ҳам ёзнинг иссиқ келиши ва ёғингарчилик кам бўлгани сабабли ҳосил яхши бўлмаганидан шикоят қилишган эди. Натижада улар чорва молларининг бир қисмини сотишга мажбур бўлишган. Бу мамлакатда чорва моллари сонининг камайиб кетишига сабаб бўлган.
Қишлоқ хўжалиги вазирлиги тарқатган маълумотларига кўра, шу йилнинг биргина август ойида Қирғизистон қўшниларга 7470 бошдан ортиқ қорамол ва 10420 бошдан ортиқ майда шохли моллар экспорт қилган бўлса, бўлгани 2770 бош қорамол ва 6 бош майда шохли моллар импорт қилган.
Собиқ совет даврида асосан чорвачиликка ихтисослашган Қирғизистонда 10 миллион бошдан ортиқ чорва моллари бўлган. Улар колхоз ва совхозларга тегишли бўлиб, сони давлат томонидан назорат қилинсада, мутахассислар Қирғизистон учун бу меъёрдан кўп эканини айтиб келишган.
Бугунги кунда чорвачилик фақат хусусий қўлларда. Чорва молларининг сони ва сифатини давлат амалда назорат қилмайди. Айрим фикрларга кўра, ҳозир одамларда совет давридагидан ҳам кўпроқ чорва моллари бор. Яйловлар эса аввалгидек қўриқланиб, парвариш қилинмайди.
Оқбура, Бишкек.
Сурат интернетдан олинди
