Қирғизистон: Танқидга чидамаган собиқ амалдор журналистга тарсаки тортди
Жабрланган журналист милиция чақириб, тартиб посбонларига ариза билан мурожаат қилди (видео).
Қирғизистоннинг Ўш шаҳрида бугун, 12 июн куни эркин журналист Идирис Исақов собиқ амалдордан калтак еди. Бу ҳақда журналистнинг ўзи хабар бериб, зўравонлик қилинган пайтда олинган видеони ижтимоий тармоқларда жойлаштирган. Унда собиқ амалдорнинг журналистга тарсаки тортиб, мушт отганини кўриш мумкин. Муштга журналист чап бериб улгурган.
Маълум бўлишича, 8-июн куни журналист ўзи олиб борган суриштирув натижасида “Раҳбарларга ем бўлган пансионат” номли материалини эълон қилган. Унда бир пайтлар давлатга қарашли пансионатнинг хусусийлаштирилиб кетгани ва бугунги кунда қаровсиз қолиб кетгани ҳақида айтилади.
Бугун журналист ўша материал давомини тасвирга олиш учун пансионатга борган ва у ерда собиқ директор Маматкарим Қўйчуқуловнинг қаршилигига дуч келган. Афтидан қўлига эрк берган собиқ директор ҳозир ўша ерда яшайди.
Воқеа тафсилотлари ҳозирча аниқ эмас, лекин видеода собиқ амалдорнинг журналистдан ҳужжат сўраб, талаб қилганини эшитиш мумкин. Исақов воқеа содир бўлган жойга милиция чақиргани ва тегишли кўрсатмаларни ёзиб берганини маълум қилган.
Идирис Исақов бунгача кўп йиллар давомида “Озодлик” радиосининг қирғиз хизматида ишлаган. Бир неча йилдан бери мустақил журналист сифатида суриштирувлар олиб бориб, ўзининг ютубдаги каналида эълон қилиб келади. Унинг каналида 450 мингдан ортиқ обуначиси бор.
Яқинда у “Озодлик”нинг қирғиз хизматидаги ҳамкасбларини қаттиқ танқид қилиб, уларни бўш, ҳокимиятга маъқул келадиган материаллар бераётганликда айблаган. Маълумки, ҳамиша ҳукуматни танқил қилиб келган, оддий одамлар ва мухолафатдаги сиёсатчиларга эркин минбар вазифасини ўтаб келаётган “Озодлик” бугун Қирғизистонда ёпилиш арафасида турибди. Суд қарори билан унинг сайти блокланган.
Исақовнинг материалларида асосан катта амалдорлар ва бойларнинг ноқонуний ишлари ошкор қилинади. Шу сабабдан бунгача уни бир неча бор судга ҳам беришган.
Журналистга тарсаки тортилгани ҳақидаги видео эълон қилингач, бу катта муҳокамага сабаб бўлди. Кўпчилик журналистнинг тарафини олса, уни ҳаддидан ошиб кетишда айблаганлар ҳам бор.
Оқбура, Бишкек
