Қирғизистон-Ўзбекистон: Чегарадан ўтиш енгиллашади

Энди икки давлат фуқаролари чегарадан оддий ID-карталари билан ўтишлари мумкин бўлади.

Ўзбекистон президенти Шавкат Мирзиёев 27 апрель куни Қирғизистон билан чегарани икки давлатнинг ички паспортлари (ID-карта) билан кесиб ўтиш бўйича халқаро шартномани имзолади. Бу ҳақда Ўзбекистон Миллий маълумотлар базаси Lex.uz сайти хабар берди.

Шавкат Мирзиёевнинг қарори билан, шу йилнинг 27 январида Бишкекда, президент Садир Жапаров билан имзоланган келишув рамий тасдиқланди.

Ҳужжатга кўра, Қирғизистон ва Ўзбекистон фуқаролари ҳар икки давлат чегарасини расман паспортсиз ва штампларсиз кесиб ўтишлари мумкин — уларга фақат ID-карта керак бўлади. Чегара постларида махсус қурилмалар ўрнатилгач (Қирғизистон-Қозоғистон чегарасидаги каби), йўловчиларни шахси чегарани ўтишда электрон шаклда тасдиқланади. Янги қоидалар қуруқликдаги чегарани пиёда ёки транспортда кесиб ўтишга ҳам, ҳатто самолётда учиб ўтганда ҳам қўлланади.

Фақат 16 ёшгача бўлган фуқаролар чегарани кесиб ўтишда хорижга чиқиш учун қўлланадиган паспортини тақдим этадилар. Илгари 16 ёшгача бўлган болалар чегарадан ўтиш учун туғилганлик ҳақидаги гувоҳномасига илова қилинган махсус варақа олишлари керак эди. Энди бу норма олиб ташланди, болаларнинг умумий паспортидан фойдаланилади.

Шуни айтиш лозимки, келишув тўла кучига кириб, ишлай бошлаши учун бироз вақт талаб қилинади. Яъни, икки давлат томонидан махсус протокол тасдиқланиши керакки, унда ID-карта билан чегарадан ўтиш учун қандай жиҳозлар ва қандай тартибда қўлланиши аниқ-тиниқ баён қилинган бўлади.

Ўзбекистон, юқорида айтиб ўтилганидек, янги қоидаларни маъқуллади, Қирғизистон томони эса тегишли қонун лойиҳасини ишлаб чиққан ва яқин кунларда Жўғўрқу Кенешда кўриб чиқилиши керак. Икки томонлама ҳуқуқий қоидаларнинг ишлаб чиқиш ва уларнинг ижросини таъминлашга тайёргарлик ишлари тахминан 1-2 ой вақт олиши маълум қилинмоқда.

Ушбу тартиб айниқса Ўзбекистоннинг Қирғизистондаги эксклав ҳудудлари бўлган Сўх, Шоҳимардон, Чўнғара каби ҳудудларидаги аҳоли учун учун катта енгиллик бўлади, уларнинг чегарадан ўтишларидаги ортиқча бюрократияга чек қўяди.

Қирғизистонликлар ҳам ўз навбатида қариндош-уруғларини зиёрат қилиш, саёҳат қилиш учун, йўл-йўлакай савдо-сотиқ ишларини бажариш учун чегарадан ортиқча расмиятчиликларсиз ўтиш имконига эга бўладилар. Ва энди штамплар қўйилавериб, тўлиб кетган хорижга чиқиш паспортларини қайта-қайта алмаштиришга ҳожат қолмайди.

Икки давлат фуқароларининг ўзаро борди-келдиларини енгиллаштириш борасидаги навбатдаги қадам – ўртада йиллар давомида ишлаб келган ва ёпилиб қолган чегара постларини очишдан иборат. Айрим маълумотларга кўра, бу соҳада ҳам анча олға силжишлар бор.

Шавкат Мирзиёевнинг 27-апрелдаги бошқа бир қарори билан, шунингдек, Ўзбекистон ва Қирғизистон ҳукуматлари ўртасида фавқулодда вазиятларнинг олдини олиш ва бартараф этиш соҳасида ҳамкорлик тўғрисидаги битим ҳам тасдиқланди.

2022-йилнинг ноябр ойида Ўзбекистон ва Қирғизистон президентлари чегара бўйича келишувларни имзолаган, шундан сўнг икки мамлакат ўртасида чегара масаласида ҳеч қандай келишмовчиликка ўрин қолмагани эълон қилинган.

Оқбура, Бишкек.

Расм интернетдан олинди

боғлиқ хабарлар

Изоҳ қолдиринг