Хайр, Spark, алвидо, Nexia! Ўзбекистон янги машиналарни ишлаб чиқаришга ўтяпти
Жорий йилда Ўзбекистон автомобиль ишлаб чиқариш ҳажми бўйича Россияни ортда қолдирди.
Ўзбекистоннинг UzAuto Motors автомобиль заводи истеъмолчиларда замонавий автомобилларга бўлган талабнинг ортиб бораётганини ҳисобга олиб, ишлаб чиқариш линияларини босқичма-босқич янги автомобил моделларига ўтказмоқда.
Ўзбек автомобилсозларининг яқинда АҚШнинг Детройт шаҳрида ҳамкор General Motors компанияси вакиллари билан музокаралар олиб боришди. Натижада моделлар қаторини янгилаш ва ишлаб чиқариш ҳажмини ошириш, UzAuto Motors заводи ишлаб чиқариш қувватини сезиларли даражада ошириш бўйича келишувга эришилди.
Шу билан бир қаторда ишлаб чиқаришни Chevrolet Tracker ва Onix русумларидан бошқа замонавий моделлар билан кенгайтириш ҳамда ишлаб чиқарилаётганларини янгилаш бўйича ишлар олиб борилмоқда.
Chevrolet Tracker автомобилини ишлаб чиқариш жорий йилнинг июл ойида йўлга қўйилди. Тез орада завод конвейеридан биринчи Chevrolet Onix автомобили ҳам чиқди. Бу русумни кенг кўламда ишлаб чиқаришни бошлаш 2023 йил бошига режалаштирилган.
Конвейерларнинг янги моделларни ишлаб чиқаришга мослаштирилиши муносабати билан, жорий йил якунида Chevrolet Spark ва Nexia автомобилларини ишлаб чиқариш тўхтатилади. Унгача Ўзбекистонда UzAuto Motors автомобилларига бўлган талабнинг юқори эканлиги инобатга олиниб, номи аталган Chevrolet Spark ва Nexia автомобилларининг бир қисмини ички бозорга йўналтирилади.
Албатта бу, энди Ўзбекистон кўчаларида Chevrolet Spark ва Nexia русумли автомобиллар йўқолиб кетади, деган гапни англатмайди. Тажриба шуни кўрсатадики, Марказий Осиё давлатларида автомобиллар 20-30 йил давомида минилаверади. Янги автомобиллар кўпайиб, аҳоли турмуш шароити яхшиланиб борган сари эски уловлар бора-бора ўз-ўзидан йўқолиб кетади.
Саноат маълумоти миллий агентлиги тарқатган хабарга кўра, сўнгги 3 ой мобайнида Ўзбекистон автомобиль ишлаб чиқариш кўлами бўйича Россияни ортда қолдирди. Жорий йилнинг апрель, май ва июнь ойлари давомида Ўзбекистонда 34 мингта автомобиль ишлаб чиқарилган бўлса, шу даврда Россия автомобилсозлари бўлгани 13,6 минг дона автомашина ишлаб чиқаришган холос.
Экспертларнинг тахминларига қараганда, агар икки мамлакатда автомобиль ишлаб чиқариш суръати бугунги даражада сақланиб қолса, 2022 йил охирига бориб, Ўзбекистон Россияга нисбатан 100 минг дона кўпроқ автомобиль ишлаб чиқара бошлайди. Ҳозир бу кўрсаткич 20,4 минг донани ташкил қилмоқда.
Россияда автомобиль ишлаб чиқариш суръати март ойидан бошлаб пасая бошлаган. Бу Украинадаги уруш туфайли киритилган санкциялар оқибатида Россия чет эллардан кўплаб замонавий ускуна ва эҳтиёт қисмларини ололмай қолгани билан тушунтирилади.
Солиштириш учун айтадиган бўлсак, Россияда ўтган йилнинг биргина июнь ойида 119,4 минг автомашина ишлаб чиқарилган эди. Шу йилнинг июнь ойида бу ерда енгил автомобиль сотиш ҳажми ўтган йилнинг июнига нисбатан беш баробарга қисқарган.
Оқбура, Бишкек
Расм интернетдан олинди
