Бухоролик келиннинг иши: Судья одамгарчилик қилди

Москвада одам ўлдириб қўйишига бир баҳя қолган аёл тез кунларда озодликка чиқади.

Москва вилоятининг Раменский тумани суди бухоролик меҳнат муҳожири И.Д. ни умумий тартибдаги аҳлоқни тузатиш колониясида 10 ой муддатга қамоққа ҳукм қилди. Ҳукм эълон қилинган кун, яъни 11 июндан тортиб кучига кирди. Бу ҳақда бизга судда таржимонлик қилган қирғизистонлик юртдошимиз Қодиржон Аҳмедов маълум қилди.

Эслатиб ўтамиз, Россиянинг Москва вилояти судларидан бирида 19 май куни Ўзбекистоннинг Бухоро вилоятидан келиб, ишлаб юрган И.Д. исмли келинга “одамга қасддан оғир жароҳат етказиш” деган айб қўйилиб, қонунга кўра унга етти йиллик қамоқ жазоси берилиши мумкин эди.

Келиннинг судда айтишича, у ўзини ҳимоя қилиш мақсадида қўлига пичоқ олган ва у билан ўзи норасмий никоҳда яшаб юрган фарғоналик А.Х. кўкрак қисмига урган.

Тергов материалларига кўра, 2021 йилнинг 15 декабрида икковлон ишдан қайтишгач, аёл овқат килишни бошлаган. Тамадди қилиб олишгач, йигит жинсий алоқа қилиш истагини билдирган, лекин И.Д. ҳайз кўраётганини айтиб, бош тортган. Йигитга ҳатто дин ҳам бу кунларда жинсий алоқа қилишни ман этганини эслатади.

Бирдан А.Х.нинг рашки қўзиб, келиннинг телефонини олган ва ундаги қўнғироқлар ҳамда смсларни текширишга киришган. Орада жанжал чиқиб, йигит келинни ура бошлаган, уни сочидан тортиб хона бўйлаб судрай бошлаганда, келин ошхонага кириб, пичоқ билан чиқади ва ўзимга ураман, деб йигитни қўрқитмоқчи бўлади. Йигит пичоқни олиб қўйиш ҳаракатида қизга ташланиб, уни бўға бошлаганда келин қўрқиб кетади.

“Шу пайт у мени бўғиб ўлдириб қўяди, деб қўрқиб кетдим ва қўлимдаги пичоқни унинг кўкрагига урдим”, дея кўрсатма беради келин терговда.

Йигит тўшакка йиқилади. Келин латта олиб келиб, қонни тўхтатишга уринганда йигит ўлишини айтиб, “тез ёрдам” чақиришни сўраган.

“Тез ёрдам” йигитни олиб кетгач, И.Д. хонада қолиб, полиция ходимларини кутган. Улар етиб келишгач, келинни ҳибсга олишган.

Йигит терговда И.Д.га нисбатан ҳеч қандай даъвоси йўқлигини айтиб, унга қаттиқ жазо қўлламасликни сўраган. Лекин бу ҳақда ёзиб бермаган ва ғойиб бўлган. Унинг ўз уйига, Фарғона вилоятининг Олтиариқ туманига кетиб қолгани гумон қилинмоқда.

Судда таржимон сифатида иштирок этган Қодиржон Аҳмедов, биринчи эри билан ажрашган И.Д.нинг Россияда расмий рўйхати йўқлиги, Бухорода етти яшар қизи ва ҳаста онаси борлигини айтиб, таҳририятдан фарғоналик йигитни топишга кўмаклашишни сўраган эди. Чунки, А.Х. келинга нисбатан даъвоси йўқлиги ҳақида ариза ёзиб, терговчига ёки Москва вилояти судига жўнатиб қўйса, И.Д. нинг, демак, унинг онаси ва қизалоғининг қисмати ҳам анча енгиллаган бўларди.

Биз бу ҳақда мақола ёздик, йигитни топишда ёрдам сўраб, мақолани ижтимоий тармоқларда тарқатдик ва тегишли, жумладан Ўзбекистоннинг мутасадди давлат ташкилотларига мурожаат қилдик, лекин жавоб ололмадик. Ҳафсаламиз пир бўлиб турганда, Москвадан қувончли хабар олдик.

Таржимон Аҳмедовнинг айтишича, судья А.Тюковнинг келинга раҳми келиб, унинг жамиятга хавф туғдирмаслиги, қилган ишидан қаттиқ пушаймон эканини кўриб, одамгарчилик қилган. Таржимон орқали айбланувчига судда нималар дейиш кераклигини ўзи ўргатиб, жазони имкон қадар енгиллатишга ҳаракат қилган.

Натижада умумий ҳисобда 10 ой қамоққа ҳукм қилинган келин бир ойда озодликка чиқадиган бўлди. Чунки унинг 6 ой тергов изоляторида ўтирган ҳар бир куни 1,5 кунга ҳисобланиб, 9 ой жазосини ўтаган ҳисобланди.

Эҳтимол уни колонияга жўнатиб ҳам улгуришмас. Чунки айрим расмиятчиликларни амалга оширгунча бир ой ҳам ўтиб кетади.

Биз мусофирликда юрган ўзбек аёлига сидқидилдан ёрдам кўрсатиб унинг қисматини енгиллатишга ҳаракат қилган таржимон Қодиржон акага, инсонпарварлик қилган судьяга ва ўз пулига қўшимча адвокат ёллаб, айбланувчини қамоқдан сақлаб қолишга ҳиссасини қўшган бухоролик миллатдошимиз Н.га миннатдорчилик билдирамиз.

“Келиннинг ҳукм ўқилгандан кейинги қувончини, қулоқларига ишонмай йиғлаганини кўрсангиз эди…”, – дея ҳиссиётлари билан ўртоқлашди Қодиржон ака.

Биз бухоролик миллатдошимизни тезроқ озодликка чиқиб, юртига, қизалоғи ва онасининг бағрига қайтишини, ўз уйида муносиб иш ва бахтини топиб кетишига тилакдошмиз.

Оқбура, Бишкек.

Сурат интернетдан олинди, мақолага даҳли йўқ.

боғлиқ хабарлар

Изоҳ қолдиринг