Юмронқозиқлар ови: Ўзбекистонга олиб ўтувчи яна бир туннель топилди

Бу жорий йилда чегара ҳудудида топилган ана шундай ноқонуний иншоотларнинг учинчиси.

Ўш вилоятининг Қорасув туманидаги уйлардан бирининг ҳовлисидан Ўзбекистон билан бириктирилган яна бир туннель топилди. Бу ушбу тумандан топилаётган учинчи тунел, дея хабар беришди Қирғизистон Миллий хавфсизлик давлат қўмитасидан (МДХҚ).

Яширин ерости йўлининг чуқурлиги 13 метр, баландлиги 1 метрдан кўпроқ, кенгилиги 70 сантиметр атрофида. Ўзбекистонгача бўлган оралиқ масофа узунлиги 170 метрни ташкил қилади.

 

Bu gönderiyi Instagram’da gör

 

UzPress (@uzpress.kg)’in paylaştığı bir gönderi


Махсус хизматнинг маълумотига кўра, тинтув ишларини олиб бориш жараёнида топилган ер остидаги туннель қазилган уйнинг эгаси Қирғизистон фуқароси экани аниқланди.

Тергов вақтида уй эгаси ўтган йилнинг сентябрь ойида ўзининг эски таниши бўлган “Рустам” исмли шахс билан гаплашиб, Қирғизистон билан Ўзбекистонни бириктирган ерости йўлини қазиш бўйича ишларни биргаликда олиб боришган, дейилади расмий маълумотда.

“Улар хўжалик махсулотларини ва чет эл валютасини ноқонуний олиб ўтиш мақсадида мазкур ишни амалга оширганини билдиришган”, – деб маълум қилади МХДҚ.

Гумондор текширув чора-тадбирлари жараёнида қилган айбига иқрор бўлиб, ушбу жиноятни фош қилишда тергов органлари билан тўлиқ хизмат қилишга тайёр эканини билдирган.

Эслатиб ўтамиз, ундан аввалроқ, 4-июнда ҳам айнан Қорасув шаҳрида Ўзбекистон билан боғлаган ерости орқали ўтган яна бир яширин йўл топилган эди. МХДҚнинг маълумотига кўра, ўша ерости йўлининг чуқурлиги 17,5 метр, узунлиги 155 метрга яқин. Кириш қисми кенглиги 1,80 метр, эни эса 70-80 сантиметрни ташкил қилади.

МХДҚдан яширин йўл контрабандага қарши комплексли тезкор-тергов тадбирлар доирасида топилганини таъкидлашди.

«Ҳозирда мазкур ер остидаги йўлни фойдаланиш орқали ноқонуний фаолиятда иштирок этганларни аниқлаш бўйича тергов олиб борилмоқда», – дейишган эди махсус хизматдан.

Бунгача, 20-майда ҳам Қорасув туманидаги Тельман қишлоғи турғунининг уйида қўшни давлат билан боғлаган шу каби яширин йўл топилган. Унинг чуқурлиги 15 метр, кириш қисми 1,8 эни 1,5 метрга яқин экани айтилган. Кириш қисмидан чегара чизиғигача 40 метр, умумий узунлиги 270 метрни ташкил қилган.

МХДҚ тарқатган видеода ерости йўлининг ичидан қўлда ясалган аравани, суюқлик ўтувчи шланг ва электр симларини кўриш мумкин.

Ушбу ҳолатда махсус хизматдан ерости йўл топилган ҳудуднинг эгаси ҳозирда Жалолобод вилоятининг Қизилжар шаҳарчасидаги психиатрия касалхонасида ётганини, ақл-ҳуши жойида эканини текшириш учун қайтадан экспертиза тайинлаш режалаштирилаётганини таъкидлашган.

Қирғизистон жанубида жойлашган Қорасув шаҳри ва тумани қўшни Ўзбекистоннинг шу номли аҳоли пункти билан чамбарчас боғлиқ жойлашган. Қирғизистоннинг Қорасувидаги машҳур бозорда икки давлат фуқаролари бемалол савдо-сотиқ қилишган. Бозорда икки давлат валютаси бирдай муомалада бўлган. Икки давлат ўртасида чегаралар пайдо бўлгач, ана шу савдо алоқаларига жиддий путур етиб, анча вақтгача чегаранинг икки томонидаги одамлар турли йўллар билан савдо-сотиқни, жумладан, валюта савдосини амалга ошириб келишган.

Одамлар юкларни икки давлатни ажратиб турган Қорасув дарёси орқали ўтказишга ҳаракат қилиб, одамлар тезоқар дарёга оқиб, нобуд бўлган ҳолатлар ҳам бўлган. Афтидан, ерости йўли орқали савдо қилиш анчадан бери мавжуд бўлгану, энди аниқлана бошланди.

Ўзбекистон тарафдан ҳали бу топилдиқлар ҳақида бирор хабар берилгани йўқ.

Умида Мирзабоева, Оқбура, Ўш.

Сурат видео интернетдан олинди

боғлиқ хабарлар

Изоҳ қолдиринг