Ҳисоб 2:0: Қувонишга ҳали эрта
Қирғизистон футболчилари Мьянма жамоасини енгди, лекин ҳал қилувчи ўйин олдинда.
Футбол бўйича Қирғизистон терма жамоаси кеча 11 июнда Бишкекда ўтган беллашувда мьянмаликларни 2:0 ҳисобида мағлуб қилди. Икки кун аввал Қирғизистон шу ерда Сингапур терма жамоасини 2:1 ҳисобида енгиб олган эди.
Осиё кубогининг келаси йили ўтадиган финал ўйинларида иштирок этиш ҳуқуқини қўлга киритиш учун Қирғизистон футболчилари 14 июн куни Бишкекда ўтадиган ўйинда Тожикистон терма командасини енгиши лозим. Тожик футболчилари кеча Сингапур жамоасини 1:0 ҳисобида енгиб, турнир жадвалидаги етакчи ўринни сақлаб қолишди.
Кечаги ўйинлардан сўнг Тожикистон ва Қирғизистон олтитадан очко тўплаб, давра ўйинлари жадвалининг 1 ва 2 ўринларини эгаллаб туришибди. Ҳар икки жамоа иккитадан ғалабага эришган, фақат голлар нисбати Тожикистон фойдасига бўлгани учун бу давлат биринчи ўринни эгаллаб турибди. Қирғизистон футболчилари давра ўйинлари давомида 4 гол уриб, битта гол ўтказиб юборишган бўлса, тожикистонликлар рақиблар дарвозасига жавобсиз беш гол киритишган.
Футбол учрашувига бу сафар ҳам президент Садир Жапаров келгани сабабли стадион ва унинг атрофида мисли кўрилмаган эҳтиёт чоралари кўрилди. Ўйин бошланишидан бир неча соат олдин шаҳар кўчаларининг стадион яқинидаги қисмларида автомобиль қатнови тўхтатилиб, стадионга киришда уч қатор текширув ташкил қилинди.
Бу сафар давлат раҳбари стадионга ўзининг рафиқаси Айгул Жапарова билан келди.
Эслатиб ўтамиз, Осиё кубоги-2023 саралаш ўйинларининг учинчи давраси олти гуруҳда ўтмоқда, ҳар гуруҳда тўрттадан жамоа мавжуд. F гуруҳида Қирғизистон, Тожикистон, Сингапур ва Мьянма давлатлари футбол жамоалари иштирок этишмоқда.
Бунгача Эрон, Корея, Бирлашган Араб Амирликлари, Ливан, Ироқ, Сурия, Сауд Арабистони, Япония, Австралия, Уммон, Вьетнам, Хитой ва Қатар давлатлари Осиё кубогининг финал ўйинларига йўлланма олишган.
Финал ўйинлари 2023 йилнинг 16 июнида Хитойда бошланиши керак эди. Лекин Хитой мамлакатдаги коронавирус пандемияси билан боғлиқ оғир эпидемиологик вазиятни ҳисобга олиб, бу имкониятдан воз кечгач, ҳозирча ўйинларнинг қаерда ўтиши ноъмалум. Бу ҳақда Халқаро футбол федерацияси жорий йилнинг кузида қарор қабул қилиши кутилмоқда.
Осиё чемпионати 1956 йилдан бери ҳар тўрт йилда бир ўтказилади. Шу давр мобайнида Япония 4 марта, Саудия Арабистони ва Эрон уч мартадан Осиё кубогини қўлга киритишган. Жанубий Корея икки марта, Исроил, Қатар, Австралия ва Қувайт бир мартадан чемпионлик нашидасини суришган.
Оқбура, Бишкек.
Суратлар ва видео интернетдан олинди
