Россияда юртдошига пичоқ урган бухоролик келин етти йилга қамалиб кетиши мумкин
Уни қамоқдан сақлаб қолиши мумкин бўлган фарғоналик йигитни топишга ёрдам беришга чақирамиз.
Россиянинг Москва вилояти судларидан бирида 19 май куни Ўзбекистоннинг Бухоро вилоятидан келиб, ишлаб юрган И.Д. исмли келин устидан суд бўлиши кутилмоқда. Бизнинг манба берган маълумотга кўра, унга “одамга қасддан оғир жароҳат етказиш” деган айб қўйилган бўлиб, 7 йиллик қамоқ жазоси берилиши мумкин.
Келиннинг айтишича, у ўзини ҳимоя қилиш мақсадида қўлига пичоқ олган. Бизнинг манба берган хабарга кўра, воқеанинг қисқа баёни қуйидагича.
Айбланувчи И.Д. Москва вилоятидаги Тельман қишлоғида, ўзининг фарғоналик таниши А.Х. билан норасмий никоҳда яшаб юрган. Улар Москва вилоятининг Раменский шаҳар округига қарашли Софьино кишлоғида “Яндекс Маркет” савдо тармоғи омборхонасида бирга ишлашган ва фожиали жанжалга қадар ижарага олинган квартирада яшаб келишган.
Айбланувчининг сўзларига кўра, 2021 йилнинг 15 декабрида икковлон ишдан қайтишгач, аёл овқат килишни бошлаган. Тамадди қилиб олишгач, йигит жинсий алоқа қилиш истагини билдирган, лекин И.Д. ҳайз кўраётганини айтиб, бош тортган. Йигитга ҳатто дин ҳам бу кунларда жинсий алоқа қилишни ман этганини эслатади.
Бирдан А.Х.нинг рашки қўзиб, келиннинг телефонини олган ва ундаги қўнғироқлар ҳамда смсларни текширишга киришган. И.Д. йиғлай бошлаган. Шунда йигит телефонни ташлаб, келинни уришни бошлаган. И.Д. ўзини ҳимоя қилишга ҳаракат қилган.
Йигит уни сочидан тортиб хона бўйлаб судрай бошлаганда, келин “бунақа яшашдан кўра ўлганим яхши”, деб бақиради. Йигит унга, “бор ўлдир ўзингни, кўрайчи, буни қандай қилар экансан…” деб жавоб беради.
И.Д. ошхонага кириб, пичоқ билан чиқади ва ўзимга ураман, деб йигитни қўрқитмоқчи бўлади. Йигит пичоқни олиб қўйиш ҳаракатида яна қизга ташланади. Ур-сур бошланиб, йигит уни бўға бошлаганда келин қўрқиб кетади.
“Шу пайт у мени бўғиб ўлдириб қўяди, деб қўрқиб кетдим ва қўлимдаги пичоқни унинг кўкрагига урдим”, дея кўрсатма беради келин терговда.
Пичоқ йигитнинг чап қўли остига санчилади. Шундагина у келинни қўйиб юбориб, тўшакка йиқилади. Келин латта олиб келиб, қонни тўхтатишга уринганда йигит ўлишини айтиб, “тез ёрдам” чақиришни сўраган.
“Тез ёрдам” 5-10 дақиқа етиб келиб, шифокорлар йигитни олиб кетишган. И.Д. хонада қолиб, полиция ходимларини кутган. Улар етиб келишгач, келинни ҳибсга олишган.
Йигит реанимацияда ўзига келади ва касалхонада даволаниб чиқади. У терговчига И.Д. билан бир йилдан буён бирга ишлаб, бирга яшаб келишганини, жанжал рашк асосида чиққанини тасдиқлаган. А.Х.нинг айтишича, у ғазабланиб, квартирадан чиқиб кетмоқчи бўлган лекин И.Д. эшикни қулфлаб, калитни бермай қўйган ва жанжал яна уланган.
“Жанжал пайтида И.Д. ошхонага кириб пичоқ олиб чиқди ва бор кучи билан кўкрагимга урди”, – дея кўрсатма берган у терговчига. – Аввал кўнглим айниди, кейин хушимдан кетдим. Реанимацияда ўзимга келдим”.
Йигитнинг айтишича, у келинни урмаган, “ҳатто туртмаган” ҳам. У И.Д.га нисбатан ҳеч қандай даъвоси йўқлигини айтиб, унга қаттиқ жазо қўлламасликни сўраган. Лекин бу ҳақда ёзиб бермаган ва тез кунларда ғойиб бўлган. Унинг ўз уйига, Фарғона вилоятининг Олтиариқ туманига кетиб қолгани гумон қилинмоқда.
Энди келин Россия Федерацияси Жиноят кодексининг 111-моддасига биноан одамга қасддан оғир жароҳат етказишда айбланмоқда. Унинг ўзи ва адвокати айбловни 114-моддага, яъни “ўзини ҳимоя қилиш мақсадида одамга мажбурий оғир тан жароҳати етказиш”га алмаштиришни сўранишмоқда. Агар йигит терговда айтган сўзларини, яъни келинга нисбатан ҳеч қандай даъвосини йўқлигини айтиб, ариза ёзиб берса ишга жуда катта фойдаси тегиши мумкин.
Аввалги эри билан ажрашган И.Д.нинг Россияда расмий рўйхати йўқ. Етти яшар қизи ва ёлғиз онаси бор.
Бу мақолани ёзишдан мақсад, эҳтимол йигитни билганлардан кимдир уни ўқиб қолар ва йигитни инсофга чақиришга кўмаклашар, деган умид. Албатта, воқеалар биз баён қилгандан бошқачароқ бўлгандир. Буни тергов ва суд аниқлайди. Лекин фикримизча, нима бўлган тақдирда ҳам, А.Х. зудлик билан келинга нисбатан даъвоси йўқлиги ҳақида ариза ёзиб, терговчига ёки Москва вилояти судига жўнатиб қўйса, И.Д.нинг, унинг онаси ва қизалоғининг қисмати анча енгиллаган бўларди.
Маълум сабабларга кўра биз воқеа қаҳрамонларининг исм-шарифларини тўлиқ ёзмадик.
Йигит Ўзбекистон фуқароси, уйланмаган, 1996 йилда Фарғона вилоятининг Олтиариқ туманида туғилган. Сўнгги йилларда Москва вилоятининг Раменский шаҳар округига қарашли Тельман қишлоғида «Яндекс Маркет» савдо омборида ишлаб келган.
Олтиариқлик ёки йигитни таниши мумкин бўлган шахслар, таҳририятимизга +996 550517456 (Вотсап, Телеграм) рақами орқали мурожаат қилишса, унинг тўлиқ исми-шарифини маълум қиламиз.
Шоядки, йигитни инсофга чақириб, бир норасида гўдакнинг онасидан, муштипар онанинг қизидан узоқ муддатга айрилишларидан, айбланувчи И.Д.ни эса ҳаёти бутунлай барбод бўлишидан сақлаб қолишга муваффақ бўлсак.
Оқбура, Бишкек.
Расм интернетдан олинди, воқеага алоқаси йўқ
