Адашганлар. Ўзга юртларда қўлга қурол олган шахслар жавобгарликка тортилади
Қирғизистон фуқаросининг Украина ҳудудида жаговар ҳаракатларда иштироки суриштирилмоқда.
Қирғизистоннинг Украинадаги элчиси Идрис Қадирқуловнинг оммавий ахборот воситалари учун тарқатган маълумотида айтилишича, элчихона бугунги кунда Украина ҳудудидаги жанговар ҳаракатларда иштирок этаётган К. уулу А. исмли қирғизистонлик фуқаро ҳақида тўла маълумотга эга.
Элчи элчихонанинг ҳозирда Украинада юрган ҳар бир Қирғизистон фуқароси ҳақида тўла маълумотга эга эканини маълум қилади.
“Номи тилга олинган К. у. А. ҳақида ҳам бизда маълумот бор. [Қирғизистон фуқароларини Украинадан] эвакуация қилиш бошлангач, элчихона унга уйига қайтишга ёрдам беришни таклиф қилиб, жанговар ҳаракатларда иштирок этмасликни сўраган. Бироқ у ватанига қайтишдан бош тортган”, деб хабар қилади Қадирқулов. – Бу ҳақда Қирғизистоннинг тегишли органларига зудлик билан хабар берилган”.
Элчининг маълум қилишича, исми аталмаган бу йигит “ҳудудий мудофаа жараёнида санитарларга ёрдам беряпти экан”. Гарчи йигитнинг Украина тарафида экани аниқ бўлса ҳам, элчихона хабарида унинг ким тарафда туриб, кимга “ёрдам бераётгани” аниқ айтилмаган.
Шу вақтнинг ўзида Қирғизистон Миллий хавфсизлик давлат қўмитаси (МХДҚ) берган хабарга кўра, К. у .А.нинг Украина ҳудудида жанговар ҳаракатларда иштирок этаётгани айтилади. Бу ҳақда йигит ижтимоий тармоқларда сурат ва видеолар жойлаштириш орқали маълумот бериб турган. МХДҚ эълон қилган видеороликка қараганда, йигит кўнгилли равишда Украина томонда жанг қилмоқда.
Йигит ўзи эълон қилган видеоларда ҳарбий кийимда ва қўлида замонавий қуроллар билан намоён бўлиб, Украинага ўтган йилнинг декабрида келганини, кўнгилли сифатида жанговар ҳаракатларда иштирок этаётганини айтади.
Видеороликда кўнгилли йигитнинг, “Кўнгиллиларга пул ҳам тўлашмаса керак… Қирғизистонга қайтамиз… Ўғлимни соғиндим”, деган гапларини эшитиш мумкин. Ролик сўнггида МХДҚ чет эллардаги жанговар ҳаракатларда иштирок этган фуқароларнинг жиноий жавобгарликка тортилиши ҳақида огоҳлантиради.
Миллий хавфсизлик қўмитаси видео муаллифининг ижтимоий тармоқларни кузатиб бориш натижасида аниқланганини, унинг Қирғизистон фуқароси эканини маълум қилади.
“Бу факт ЕРПП (жиноят ва ҳуқуқбузарликларнинг ягона реестри)да рўйхатга олинган ва ҚР Жиноят кодексининг “Қирғизистон фуқаросининг чет давлат ҳудудидаги ҳарбий жанжал ёки ҳарбий ҳаракатларда иштирок этиши…” моддаси билан рўйхатга олинган”. Тергов давомида қирғизистонликнинг ҳарбий ҳаракатларда иштироки факти текширилмоқда”, дейилади қўмитанинг баёнотида.
Эслатиб ўтамиз, Украина пойтахти Киевни ишғол қилиш ниятидан қайтган Россия аскарлари Киев атрофини тарк эта бошлагандан сўнг аввал эвакуация қилинган 38 давлат элчихоналари ходимлари яна Киевга қайтиб, ўз фаолиятларини давом эттира бошладилар. Қирғизистон ҳам ўша давлатлар каби ўз элчихонаси фаолиятини давом эттирмоқда.
Бу муносабат билан Украина Ташқи ишлар вазирлиги ўзининг расмий сайтида қайтиб келган элчихоналарга миннатдорчилик билдирган.
“Бу ҳамкорларимизнинг Украинанинг ғалабасига, келажаги ва истиқболига ишонишларининг яна бир исботи. Қўллов учун дўстларимизга раҳмат! Ишонамизки, яқинда пойтахтга барча чет эл ваколатхоналари қайтиб келишади”, – дейилади расмий баёнотда.
Эслатиб ўтамиз, жорий йилнинг 24 февралида Россия қўшинлари Украина ҳудудига бостириб киргандан бери жанггоҳларда ҳалок бўлган Марказий Осиё давлатларининг собиқ ва амалдаги фуқаролари ҳақида хабарлар чиқиб турибди. Расмий тан олинган марҳумларнинг асосий қисми Россия фуқаролигини олиб, ҳарбий хизматга чақирилган йигитлардан иборат экани маълум.
Оқбура, Бишкек.
Расм ва видеоролик интернетдан, МХДҚ сайтидан олинди.
