Эркин кураш: қирғизистонлик полвонлар Туркияда олти медални қўлга киритишди
Сўнгги йилларда курашнинг турли йўналишларида қирғизистонлик полвонлар фаоллик кўрсатишмоқда.
Қирғизистонлик спортчилар Туркияда ўтган кураш бўйича «Yasar Dogu-2022» анъанавий халқаро турнирида олти медални қўлга киритишди. Бу ҳақда Қирғизистоннинг кураш федерацияси хабар қилди.
Спорт мусобақалари 24-27-февралда Истанбул шаҳрида бўлиб ўтди. Бу ўйинлар саралаш мусобақалари ҳисобланиб, ғолибларга йирикроқ жаҳон миқёсидаги спорт мусобақаларига йўлланма беради.
Эркин кураш бўйича мусобақада иштирок этган қирғизистонлик курашчи, 57 килограммлик вазн тоифасидаги Алмаз Сманбеков финалда грузиялик рақиби Бека Бужиашвилини мағлуб этиб, олтин медални қўлга киритди.
Шунингдек, мусобақада кураш майдонига чиққан қирғизистонлик спортчилар Улуқбек Жолдошбеков (61 кг), Исламбек Орозбеков (74 кг), Арсалан Будажапов (70 кг) бронза медали соҳибига айландилар.
Аввалроқ, мазкур мусобақаларда қирғизистонлик курашчи қизларимиздан Айпери Медет қизи 76 кг вазнгача бўлган тоифада курашиб, олтин медални қўлга киритган. У финал босқичида австриялик спортчи Мартина Куэнцни 6:4 ҳисобида мағлуб этди. Токиода ўтган Олимпиадада ҳам Айпери ўз маҳоратини кўрсатган, лекин у ердан медалсиз қайтган эди.
Жаҳон чемпиони, Токиодаги Олимпиаданинг (2021) бронза медали соҳибаси Мээрим Жуманазарова эса 68 кг вазнда кумуш совринга эга бўлган. У финал мусобақасида нигериялик курашчи Блессинг Оборудуду билан курашиб, 3:0 ҳисобида мағлуб бўлиб қолди.
Жуманазарова биринчи мусобақада россиялик спортчи Татьяна Смолякни мағлуб этиб, ярим финалга ўтган. Ярим финалда эса Россиянинг яна бир спортчиси, таниқли Ханум Велиева устидан ғалаба қозониб, финалга ўтган эди.
Афсуски, бу сафар Қирғизистон спорти юлдузи, Токиодаги Олимпиаданинг кумуш медали соҳибаси Айсулуу Тинибекованинг омади чопмади. Истанбулдаги мусобақаларда у биринчи курашдаёқ ғалабани бой бериб қўйди.
2021-йили ўтган “Yasar Dogu” халқаро турнирида 11 нафар қирғизистонлик курашчи иштирок этиб, ватанга беш медаль билан қайтган эди.
Юсуф Муҳаммад, Оқбура, Бишкек.
Суратлар “Кабар” агентлиги сайтидан олинди
