Биттагина спортчи. Пекиндаги қишки олимпиада ўйинлари ҳам ниҳоясига етди

Кучли сиёсий босим остида ва пандемия шароитида ўтган ўйинларда мезбонлар учинчи бўлишди.

Эслатиб ўтамиз, қишки олимпиада ўйинлари 4 февралдан 20 февралгача давом этди. Ўйинларда 109 та медаллар комплекти ўйналиб, спортнинг 15 та йўналишни қамраб олган етти тури бўйича мусобақалар ўтказилди.

Очилиш ва ёпилиш маросимларининг одатдан ташқари ҳайратомуз бўлгани билан эсда қоладиган бу ўйинларда 37 та медаль билан Норвегия спортчилари етакчи бўлдилар. Иккинчи ўринни Германия эгалласа, 3-ўрин мезбонларга, Хитой спортчиларига насиб этди.

Йирик давлатлардан Америка Қўшма Штатлари спортчилари тўртинчи ўринни эгаллашса, россияликлар тўққизинчи ўринда қолиб кетишди.

Олимпиаданинг тантанали ёпилиш маросимида Хитой Коммунистик партияси раиси Си Цзиньпин ва Халқаро олимпия қўмитасининг президенти Томас Бах иштирок этдилар. Анъанага кўра, Пекин шаҳрининг мэри Олимпия ҳаракати байроғини 2026 йилги Олимпиада ўйинлари ўтадиган Милан шаҳри мэрига топширди.

Олимпиадага Қирғизистондан биргина спортчи, чанғичи Максим Гордеев борди, лекин у биринчи уринишдаёқ ўйиндан чиқиб кетди. Кейинроқ у ўзининг мағлубиятига оёғидан олган шикаст сабаб бўлганини маълум қилди. Машқ қилиш пайтида у оёғини қўққислатиб олган, пойга бошланганда эса оёғи зўр бериб оғриб, спортчи қийнала бошлаган ва охир оқибатда кескин бурилишларнинг бирида йиқилиб тушган.

Ўзбекистондан борган Комилжон Тўхтаев ҳам тоғ чанғиси мусобақаларида қатнашиб, 42-натижани қайд этди. Бироқ, дастурдаги техник хато туфайли бу натижани ҳакамлар ҳисобга олишмади.

Хитой пойтахтида бўлиб ўтган 2022 йилги қишки Олимпия ўйинлари кучли дипломатик босим остида ўтди. АҚШ, Буюк Британия, Канада, Дания, Бельгия ва бошқа давлатлар ушбу тадбирларга ҳукумат амалдорлари ва расмийларини юборишдан бош тортишди. Франция президенти Эммануэль Макрон ва бошқа кўплаб сиёсатчи ва таниқли спортчилар олимпиада ўйинларини сиёсийлаштирмаслик кераклигини таъкидлади.

Оқбура, Бишкек.

Сурат интернетдан олинди