Хавотирга ўрин йўқ…ми? Унда нега журналистнинг уйида тинтув ўтказилган?
Бишкекда ушланган журналист Семетей Талас уулу гувоҳ сифатида сўроқ қилингани ва хавотирга ўрин йўқлигини айтди.
Кеча, 18 февраль куни уйидан махсус хизмат ходимлари томонидан олиб кетилган журналист Семетей Талас уулу бир жиноий иш бўйича гувоҳ сифатида сўроқ қилингач, унга уйига кетишга рухсат берилган. Бу ҳақда унинг ўзи Миллий Хавфсизлик давлат қўмитаси биносида ўтказилган сўроқдан чиққач, журналистларга айтган. У ўзининг уйидан олиб кетилишини сиёсий буюртма сифатида баҳоламаслигини ҳам маълум қилган.
“Аввалига мен ижтимоий тармоқларда ёзган нарсаларим учун ҳибсга олиндим, деб ўйлаган эдим. Лекин бундай эмаслиги маълум бўлди. Ҳозир бир иш боюнча тергов юряпти экан, шу иш бўйича мени гувоҳ сифатида чақиришибди”, – деди у бу ҳақда бошқа маълумот бера олмаслигини айтиб. Семетей шуни ҳам қўшимча қилдики, унинг гувоҳ сифатида чақирилишига унинг ижтимоий тармоқларда ёзган бир хабари сабаб бўлган.
Семетей Талас уулу мустақил журналист. У асосан уюшган жиноятчилик ва коррупция ҳақидаги мақолалари ва бу ҳақда ижтимоий тармоқларда ёзиб турадиган хабарлари билан кўпчиликка маълум. Ўзига нисбатан хавф сезмагани учун у адвокат ёллашни ҳам истамаган. У ўзига қўллов кўрсатгани учун ҳамкасбларига ва барча мухлисларига миннатдорчилик билдирган.
Эслатиб ўтамиз, кеча Семетей Талас уулуни махсус хизмат ходимлари уйидан олиб кетишган. Аёли бу пайтда уйда бўлмаган. Унинг қайнонасининг айтишича, Семетейга нисбатан куч ишлатилмаган. Лекин журналистнинг уйи тинтув қилиниб, у ердан 9 дона диний китоблар олиб кетилган.
Китобларни олиш чоғида Семетейга унинг қандайдир экстремистик материалларни тарқатганлигини айтиб, бу китобларни охиригача ўқиган ёки йўқлигини сўрашган. Семетей китобларни охиригача ўқимагани ва айрим ўзига ёққан жойларини ижтимоий тармоқлар орқали тарқатганини айтган. Китоблар экспертизадан ўтказиш учун юборилгани ҳам маълум бўлди.
Журналистнинг эркинликка чиққани яхши албатта, лекин бу ишда жўяли саволлар туғилмай қолмайди. Масалан, нега уни гувоҳ сифатида қонун асосида, чақирув қоғози орқали расмий чақиришмаган? Нега унинг уйида тинтув ўтказишган, экстремистик материаллар тарқатганини айтишган? Бу тили ўткир журналистнинг дамини қайтариб қўйишга уриниш эмасми?
Охирги пайтда Қирғизистонда журналистларга босим ўтказиш кучайиб бораётгани маълум. Масалан, “Кактус” мустақил нашри Тожикистондаги интернет нашрининг мақоласини кўчириб босгани учун жиноий иш қўзғалган. Яна бир мустақил журналист Болот Темиров бир амалдорнинг оиласига боғлиқ бизнес ҳақида ёзгани учун унга нисбатан ҳам жиноий иш қўзғалган. Болот Темиров ва Семетей Талас уулу ҳам, “Кактус” журналистлари ҳам ҳокимият органлари ва йирик амалдорларни жиддий танқид остига олиб туришлари билан маълум.
Оқбура, Бишкек.
Сурат Клооп сайтидан олинди
