Олимпиада-2022: Максим манзилгача етиб келолмади
Пекин олимпиадасида иштирок этган ягона қирғизистонлик спортчининг омади келмади.
Қирғизистонлик Максим Гордеев Пекин олимпиадасининг бугун эрталаб бошланган тоғ чанғиси мусобақаларида иштирок этиб, биринчи уринишда белгиланган маррага етиб кела олмади. Бу унинг ўйиндан чиққанини англатади.
Спортнинг бу тури бўйича жами 88 спортчи иштирок этиб, улардан 52 нафаригина маррага етиб кела олишди. Мусобақа шартларига кўра, икки уринишда маррага биринчи бўлиб келган спортчи ғолиб ҳисобланади.
Максим Гордеев Пекинда ўтаётган қишки олимпиада ўйинларида иштирок этаётган қирғизистонлик ягона спортчи. Олимпиада иштирокчиси бўлишнинг ўзи иссиқкўллик тоғ чанғиси бўйича оддий инструктор учун катта шараф эканини айтиб ўтиш лозим.
Аталган мусобақаларда норвегиялик Лукас Браатен олдинда бормоқда. Бироқ олти уринишда у фақат бир марта енгган холос. Ундан бошқа спортчиларнинг кўрсаткичлари ҳам ўта яхши эмас. Яна бир норвегиялик Себастьян Фосс ҳамда британиялик Дейв Райдинг, франциялик Клеман Ноэль, германиялик Линус Штрассер ҳамда австриялик Йоханнес Штрольцлар ҳам олти уринишда биттадан ғалабага эришганлар холос.
Бу мусобақаларда Россиядан уч спортчи иштирок этяпти. Мутахассисларнинг эътироф этишларича, улардан биттаси – Александр Хорошиловнинг медаль олишига умид қилса бўлади.
Кўриниб турибдики, спортнинг бу турида илғорлик қилаётган спортчиларнинг ҳаммаси тоғларида қиш давомий бўладиган, демак, чанғи спорти билан шуғулланиш имкониятлари кенг бўлган мамлакатлар вакиллари. Қирғизистонда эса чанғи ва бошқа қишки спорт турлари билан мавсумий тарзда шуғулланиш мумкин холос.
Оқбура, Бишкек.
Сурат Максим Гордеевнинг Фейсбукдаги саҳифасидан олинди
