Яшил ҳудудда: Қирғизистонда коронавирусга оид вазият яхшиланмоқда
Январь бошида кузатилган ўсишдан сўнг вирусга чалинганлар сони яна камая бошлади.
Вазирлар Маҳкамаси матбуот хизмати берган хабарга кўра 11 февралдан бошлаб Қирғизистонга киришда эмланган фуқаролар учун ПЗР тести натижалари ҳам бўлиши лозимлиги тўғрисидаги қоида бекор қилинди.
Бир кун аввал Вазирлар маҳкамаси раисининг ўринбосари Эдил Байсалов коронавирус инфекциясига қарши курашиш бўйича Республика штабининг йиғилишида Соғлиқни сақлаш вазирлигига қатор чоралар амалга оширишни топширган. Жумладан, 11 февралдан бошлаб коронавирус билан касалланган беморлар билан алоқада бўлган шахсларни изоляция қилиш ва эмланган фуқаролар учун мамлакатга киришда ПЗР тести натижаларининг кўрсатиш талаби бекор қилинди.
Энди Қирғизистонга киришда КОВИДга қарши эмланган фуқаролар эмланганлиги тўғрисидаги гувоҳномани кўрсатишлари кифоя. Эмланмаганлар эса ПЗР тести натижалари билан сертификатни тақдим этишлари керак. Бунгача Қирғизистон ҳукумати қарорига кўра мамлакатга кирувчи барча фуқаролардан эмланган ёки йўқлигига қарамай, ПЗР тестидан ўтиш талаб қилинарди. Бу чекловлар коронавируснинг омикрон штамми тарқалиши муносабати билан жорий қилинган эди.
Бундан ташқари, янги йил байрамларидан сўнг Қирғизистонда коронавирусга чалинганлар сони кескин ошиб кетди. 12 январь куни эса мамлактда коронавируснинг омикрон штамми аниқлангани эълон қилинди.
Февраль ойи бошидан Қирғизистон Республикасида коронавирус инфекцияси билан касалланиш даражаси пасаймоқда. Бугун Қирғизистон коронавирус пандемиясининг халқаро меъёрларига кўра, “яшил ҳудуд”га киритилган. Бу республика фуқароларининг бошқа давлатларга қилаётган саёҳатларини, жумладан умра зиёратига боришларини енгиллаштирмоқда.
Бугунги кунда кунига мамлакат бўйлаб коронавирусга чалинганарнинг ўртача сони 100 нафарга етмайди. Шу вақтнинг ўзида расмий маълумотларга кўра, бу вирусга чалинган одамлар 3 мингга яқин бўлиб, уларнинг 2,5 мингга яқини уй шароитида, 500 нафардан ортиғи касалхоналарда даволанмоқда. Уларнинг 237 нафарининг аҳволи оғир.
Оқбура, Бишкек.
Расм интернетдан олинди
