Гилам сотсанг… Завод эгаси Россияда, даромади эса Ўзбекистонда
Россиялик олигарх Алишер Усмонов Ўзбекистондаги энг йирик цемент заводларидан бирини сотиб олди.
Алишер Усмоновга қарашли USM холдингининг Akkermann Cement CA ширкати Ўзбекистондаги “Охангаронцемент” корхонасининг 98,6 фоиз акциясини сотиб олди. Бу ҳақда ширкат матбуот хизматига таянган ҳолда “Газета.uz” нашри хабар берди.
Akkermann Cement CA компаниясининг директорлар кенгаши раиси Антон Селявконинг айтишича, USM холдингининг асосий эгаси Алишер Усмоновнинг ватани бўлган Ўзбекистонга қилинган барча сармоялар каби “Охангаронцемент” корхонасига ажратилган сармоялар ҳам биринчи галда мана шу мамлакатнинг ривожланиши учун сарфланади.
“Ишлаб чиқаришдан олинган барча даромад шу ерда айланади, Ўзбекистонда қолади ва республиканинг ижтимоий-иқтисодий ривожланишига йўналтирилади. Бунда биз катта салоҳиятни кўряпмиз. Аҳоли сонининг ўсиши, сифатли янги турар-жойга бўлган талабнинг ортиши… цементнинг ишлатишга бўлган эҳтиёжни оширади”, дейди Антон Селявко.
Турли маълумотларга кўра ҳозирда Россияда цемент аҳоли ва қурилиш компаниялари эҳтиёжларидан ортиқча ишлаб чиқарилмоқда. Хабарда таъкидланишича, Akkermann Cement CA Россиядаги Новотроицк ва Горнозаводск шаҳарларидаги йирик цемент заводларига эгалик қилади ва 2021 йилда 4 миллион тонна цемент ишлаб чиқарган.
“Охангаронцемент” Ўзбекистондаги энг йирик тўртта цемент заводларидан бири. Интернетда берилган расмий маълумотларга кўра 2017 йилнинг охирида Россия Хитойнинг Beijing Triumph International Engineering Со ширкати билан ҳамкорликда «Охангаронцемент» корхонаси базасида йилига 3 миллион тонна цемент ишлаб чиқариш қувватига эга бўлган завод қурилиши ҳақида битимга келган. Ўтган 2021 йил охирида корхонада йилига 2,5 миллион тонна қуруқ цемент ишлаб чиқарувчи янги линия ишга туширилган.
“Охангаронцемент” 2019 йилда 179,8 млрд. сўм соф фойда олган бўлса, 2020 йилнинг 9 ойидаёқ фойда кўлами 187,1 млрд. сўмга етган.
Янги йилнинг 13 январида “Охангаронцемент”нинг ўша пайтдаги эгалари бўлган Lamanka Enterprises Limited ва Giacinttar Limited компаниялари ўзларнинг корхонадаги акцияларини сотишларини эълон қилиб, уларнинг қарийб 5 миллионга яқин акциялари 1 триллион 886 милрд. 758 миллион сўмга баҳоланган.
Ўзбекистонда цемент ишлаб чиқарувчи “Қизилқумцемент”, “Қувасойцемент” ва “Бекободцемент” корхоналарининг эгалари каби “Охангаронцемент”нинг эгалари бўлган аталган компаниялар ҳам Кипрда рўйхатга олинган. Бундай оффшор ҳудудларда рўйхатга олинган компанияларнинг ишлаб чиқариши кўлами ва солиқларни тўлаш борасидаги ишларини назорат қилиш қийин экани маълум. Шу сабабли солиқдан қочган ёки бошқа ноқонуний йўл билан даромад олиш истагида бўлган бойлар ўз компанияларини оффшор ҳудудларда рўйхатдан ўтказадилар.
Гилам сотсанг қўшнингга сот, бир четида ўзинг ўтирасан, дейилганидек, “Охангаронцемент”нинг Алишер Усмоновнинг компаниясига сотилиши Ўзбекистон ва унинг аҳолиси учун кўпроқ фойда олиб келишига умид қилса бўлади.
Оқбура, Бишкек.
Суратлар интернетдан олинди
