Пандемия хавфи: Ўзбекистон чегарасини қисман ёпмоқда

Бу қарор Қозоғистон билан бўлган чегарага тегишли, Қирғизистон бундан мустасно.

Ўзбекистон Ташқи ишлар вазирлигининг билдиришича, Ўзбекистон 15 январдан бошлаб Қозоғистон билан чегараларини аҳоли ўтиши учун вақтинча ёпади. Баёнотда бу қарорнинг коронавируснинг “Омикрон” штамми тез тарқалиб бораётгани билан боғлиқ” экани айтилган.

Янги йилнинг дастлабки кунларида Қозоғистонда коронавируснинг «Омикрон» штамми катта тезликда тарқалаётгани қайд этилган. Бунга жавобан мамлакат ҳукумати жамоат жойларида фуқаролар учун бир қатор чекловлар киритишга қарор қилган. Жумладан, одамлар савдо марказлари, спорт заллари, ҳаммом ва бошқа жамоат жойларига кириши учун «Яшил» мақомга эга бўлиш керак. Бу мақомни олиш учун фуқароларнинг ПЗР тест топширгани ва унинг натижаси салбий экани ҳақидаги ҳужжати бўлиши керак, бу ҳужжат фақат етти кунгача яроқли ҳисобланади. Ёки бўлмаса, кўпи билан ўтган уч ой ичида коронавирус билан оғригани ҳақидаги қоғоз бўлиши лозим.

Бошқа қўшни давлатлар каби Ўзбекистонда ҳам сўнгги кунларда коронавирусга чалинганларнинг сони ортиб бораётгани кузатилмоқда. Жумладан, 7 январь куни биринчи бор чет элдан келган фуқарода «Омикрон» штамми борлиги аниқланган.

Мазкур чекловлар авиақатновларга чиптаси борларга ва ватанига қайтаётган шахсларга дахл қилмайди. Шунингдек, халқаро юк ташувчи ҳайдовчилар, дипломатлар ва уларнинг оилалари, Қозоғистонда доимий яшаётган ўзбекистонликлар ва Ўзбекистонда доимий яшаётган қозоғистонликлар, талабалар, даволанишга, оғир касал бўлган яқин қариндошларини кўришга, яқин қариндошларининг дафн маросимига бораётган шахслар ҳам чегарадан бемалол ўтишлари мумкин.

Қирғизистон билан чегарада ҳеч қандай ўзгариш йўқ. Яъни, аввалгидай Қирғизистондан Ўзбекистонга ўтаётганлар коронавирусга чалинмагани тўғрисида камида 48 соат олдин топширилган ПЗР тест натижасини кўрсатишлари шарт.

Бошқа давлатларидан Ўзбекистонга кираётганлар эса камида 48 соат олдин топширилган ПЗР тест натижасини тақдим этишдан ташқари, экспресс-антиген тест топширишлари ҳам шарт.

Оқбура, Бишкек

боғлиқ хабарлар

Изоҳ қолдиринг