Тўққиз ёшли Сумайянинг ўлими. Тергов боши берк кўчага кириб қолдими?
Милиция қотилликда гумон қилиб, сўнг ҳибсдан бўшатган шахс энди айбини тан олмаяпти.
Кеча, 23 декабрь куни Қирғизистоннинг Жалолобод вилояти ички ишлар бошқармаси 9 ёшли Сумайя Ҳосилжонованинг ўлдирилиши бўйича жиноятнинг фош қилинганини эълон қилган эди. Қизалоқнинг йўқолиб қолгани ҳақида шу йилнинг ноябрь ойида маълум бўлган. Милиция бу жиноятда гумон қилиб, қўлга олинган У.А. айбини бўйнига олганини, лекин унинг рухий ҳаста сифатида рўўйхатда тургани учун уйига қўйиб юборган эди. Буни тартиб посбонлари қотилга нисбатан суд-психиатрия экспертизаси тайинлангани билан тушунтиришган.
Шу йилнинг 18 ноябрь куни Жалолобод вилоятининг Сузоқ туманида яшовчи фуқаро 9 ёшли қизининг мактабдан кейин уйига қайтмагани ҳақида ариза билан милицияга мурожаат қилган. Тўққиз кунлик қидирувдан кейин, 27 ноябрь куни қизнинг жасади Сузоқ туманининг Орол қишлоғи яқинида, Кўк-Арт дарёси қирғоғида топилган.
Мазкур ҳолат юзасидан қотиллик факти қайд этилиб, тергов ҳаракатлари бошланган ва қизни ўғирлаб, ўлдиришда гумон қилиниб, шу ҳудудда яшовчи 48 ёшли У.А. қўлга олинган.
Дастлабки маълумотларга кўра, гумон остидаги шахс 10 йил аввал аёли билан ажрашган ва Сузоқ туманидаги қишлоқлардан бирида ёлғиз яшаб келаётгани аниқланган. У 18 ноябрь куни Сумайяни йўлда кузатиб бориб, алдов йўли билан уйига киритган ва бир неча кун давомида уйининг ертўласида сақлаган.
Милициянинг берган маълумотига кўра, қотил қизни ёпишқоқ лента билан боғлаб, совуқда сақлагани ҳақида далиллар мавжуд. Бу кунлар давомида қизнинг қай аҳволда бўлгани, унга қарши зўрлик қилингани ҳақида маълумот берилмаган. Бир неча кундан кейин қиз вафот этгач, жиноятчи тунда жасадни олиб чиқиб, дарё қирғоғига ташлаган. Қизнинг кийим-кечак ва ўқув қуролларини ёқиб юборган.
Милиция жиноятнинг очилгани ҳақида хабар бергандан сўнг кўп ўтмай, У.А.нинг ёқловчиси гумондорнинг бўйнига олган айбни инкор этганини маълум қилди. Унинг айтишича, милицияда қўрқиб кетиб, қилмаган ишни бўйнига олган.
Сумайянинг яқинлари терговчилар ҳамон улар билан сўроқ-савол ишларини олиб боришаётганини айтишиб, бу иш бўйича аниқ бир нарса дейиша олмади. Чунки уларнинг У.А.дан гумон қилишга асослари йўқ. Шубҳа остига олинган бошқа шахсларга ҳам даъво қилиш учун асос бўлмаган.
Тергов давомида аниқланишича, У.А. бунгача вилоят касалхонасининг психоневрология бўлимида рўйхатда турган. Милиция унинг экспертизадан ўтиш учун Қизил-Жар қишлоғида жойлашган психиатрия диспансерига жўнатилишини айтганди. Буёғи энди нима бўлади, айтиш қийин ва бу ҳолат қатор саволларни пайдо қилади.
Энг аввали, милиция ходимларидаги бу қадар совуққонлик қаердан келди? Улар гумон қилинган шахснинг “ақли жойида” бўлмаса, унинг экспертизадан ўтгунга қадар қочиб кетмаслиги ёки яна бирор одамнинг умрига зомин бўлмаслигига кафолат бера олишадими? Экспертизага жўнатилгунга қадар уни милицияда ушлаб туриш керак эмасмиди?
Оқбура, Бишкек.
Суратлар интернетдан олинди
