Кўчманчилар ўйини ЮНЕСКОнинг рўйхатига киритилди
Бу мусобақалар Қирғизистон ташаббуси билан 2014 йилдан буён ўтказилиб келади.
Кўчманчилар ўйинини ЮНEСКОнинг номоддий маданий мерослар рўйхатига киритиш ҳақидаги қарори жорий йилнинг 16 декабрида, ташкилотнинг Франциядаги штаб-квартирасида, онлайн тариқасида бўлиб ўтаётган ҳукуматлараро қўмитаси сессиясида қабул қилинди.
Жаҳон кўчманчи ўйинлари Қирғизистон ташаббуси билан 2014 йилдан буён ўтказиб келинмоқда. Қирғизистонда ўтган биринчи ўйинларда 19 давлатдан 580 нафардан ортиқ спортчи иштирок этган. Ўйинларнинг бориши қарийб 230 млн. кишилик аудиторияга эга бўлган 40 мамлакатга жонли эфир орқали узатилиб турган.
Кўчманчилар ўйини бунгача ҳар икки йилда Қирғизистоннинг ўзида ўтказилиб, 2018 йилдаги мусобақаларда 66 давлатдан 1500 спортчи иштирок этган. Унга дунёга машхур актёр ва айкидо кураши устаси Стивен Сигал ҳам ташриф буюрган. Ўйинлар халқаро миқёсда оммалашгач, 2020 йилдаги ўйинларни ўтказишни Туркия ўз бўйнига олганди. Бироқ пандемия туфайли мусобақалар ўтказиш вақти икки бора кўчирилган. Яқинда Туркия ҳукумати ўйинларнинг 2022 йилда ўтказилишини эълон қилди.
ЮНЕСКОнинг аталган сессияси қарори билан “Лочинчилик” номинацияси ЮНEСКОнинг инсоният номоддий маданий мероси репрезентатив рўйхатига киритилди.
Ўтиб бораётган йилда ЮНEСКОнинг номоддий маданий мерос рўйхатига киритиш учун бутун дунёдан жами 59 та тақдимот кўриб чиқилмоқда. Бунга қадар аталган рўйхатга дунёнинг турли мамлакатларидан 601 субъект киритилган.
Оқбура, Бишкек.
Сурат интенетдан олинди
