Ўзимизда етарли. Ўзбекистонга четдан автомобиль олиб келиш камайган
Шу вақтнинг ўзида мамлакатга электромобилларни импорт қилиш кўпаймоқда.
Ўзбекистон Давлат статистика қўмитаси берган маълумотларга кўра, жорий йилнинг 9 ойи мобайнида мамлакатга 18 мингдан кўпроқ енгил автомобиль импорт қилинган. Уларнинг умумий қиймати 390,2 миллион АҚШ долларига тенг бўлган. Ўтган йилнинг шу даврида мамлакатга 2 минг 300 машина кўпроқ олиб келинган эди.
Маълумотда автомобиль импортининг камайиши сабаблари кўрсатилмаган.
Статистика қўмитаси маълумотларига кўра, аталган вақт орасида Ўзбекистонга дунёнинг 10 яқин давлатидан қиймати 10,5 млн. АҚШ долларига тенг бўлган 558 дона электромобиль сотиб олиб келинган. Бу ўтган йилнинг 9 ойи билан солиштирилганда қарийб 7 баравар кўпдир.
Аталган автомобиллар дунёнинг йигирмадан ортиқ давлатларидан олиб келинган. Жумладан, Хитойдан деярли 5000 та, Жанубий Кореядан 4 минг 600дан кўпроқ, Россиядан 3 минг 400га яқин, қўшни Қозоғистондан қарий 2 минг 800 дона, Польшадан 1000 га яқин автомашина келтирилган бўлса, қолган техника АҚШ, Литва, Таиланд, Германия ва ҳатто Туркиядан олиб келинган. Дунё автомобиль саноатининг пешқадами бўлган Япониядан бўлгани 72 дона автомобиль келтирилган, холос.
Электромобиль импорти бўйича ҳам Хитой пешқадамлик қилаётгани кўрсатилган.
Эслатиб ўтамиз, Ўзбекистон Марказий Осиё давлатлари ичида ўз автомобиль саноатига эга бўлган ягона давлат ҳисобланади. “Уавто Моторс” ҳиссадорлик жамияти йилига 370 минг автомобиль ишлаб чиқариш қуввватига эга. Асосий завод Асака шаҳрида жойлашган бўлиб, унинг икки филиали бор.
Бугунги кунда автомобиль компаниясида “Шевролет” ва “Равон” брендлари остида Spark (R2), Nexia (R3), Cobalt (R4), Lacetti (Gentra), Damas, Labo, Malibu, Tracker, Equinox, Trailblazer, Traverse вa Tahoe каби автомобиль моделлари ишлаб чиқарилади. Автомобиль маҳсулотлари дунёнинг бир неча давлатларига, жумладан Россияга экспорт қилинади.
Оқбура, Бишкек.
Расм интернетдан олинди
