Шавкат Мирзиёевни ҳамкасблари сайловдаги ғалабаси билан қутламоқдалар
Якшанба куни бўлиб ўтган президент сайловида ғолиб бўлган Мирзиёвга сайловчиларнинг 80 фоиздан ортиғи овоз берган.
Ўзбекистон Республикаси Марказий сайлов комиссияси тарқатган маълумотга кўра, 24 октябрь, якшанба куни ўтказилган президент сайловида ҳаракатдаги президент Шавкат Мирзиёев мутлоқ ғалабага эришган. Дастлабки маълумотларга кўра, Мирзиёевга сайловчиларнинг 80 фоиздан ортиғи овоз беришган. Ҳаммаси бўлиб бу лавозимга беш номзод даъвогарлик қилган эди.
Ғолибни биринчилардан бўлиб, Россия президенти Владимир Путин, Беларусь президенти Александр Лукашенко, Қозоғистон президенти Қасим-Жўўмарт Тўқаев, Қирғизистон президенти Садир Жапаров, Туркия президенти Тайип Эрдоган ва бошқалар табриклашган. Янги сайланган президент номига дунёнинг турли давлатларидан табрик телеграммалари келишда давом этяпти.
Шавкат Миромонович Мирзиёев 1957 йилнинг 24 июлида Ўзбекистоннинг Жиззах вилояти, Зомин туманида туғилган. 1981 йили Тошкент ирригация ва қишлоқ хўжалигини механизациялаш муҳандислари институтини битирган. Техника фанлари номзоди, доцент.
1990 йили Республика Олий Совети депутатлигига сайланган. 1992 йилда Тошкент шаҳрининг Мирзо Улуғбек тумани ҳокими, 1996-2001 йилларда Жиззах вилояти ҳокими, 2001-2003 йиллар мобайнида Самарқанд вилояти ҳокими лавозимларида ишлаган.
2003, 2005, 2010, 2015 йилларда Олий Мажлис палаталари томонидан Бош вазир лавозимига тасдиқланган.
2016 йилнинг сентябрида мамлакатнинг биринчи президенти Ислом Каримов тўсатдан вафот этгач, Ўзбекистон парламент палаталарининг қўшма қарорига мувофиқ президентининг вазифасини ва ваколатларини бажариш вақтинча Шавкат Мирзиёев зиммасига юкланаган.
Сўнг, 2016 йил 4 декабрида бўлиб ўтган Президент сайлови якунлари бўйича сайловчиларнинг 88,61 фоиз овози билан Ўзбекистон Республикаси Президенти этиб сайланган.
Ш. Мирзиёев рафиқаси З. Мирзиёева билан икки қиз ва бир ўғилни вояга етказишди. Олти нафар набиралари бор.
«Меҳнат шуҳрати» ва «Фидокорона хизматлари учун» орденлари билан тақдирланган.
Марказий сайлов комиссияси берган маълумотга кўра, сайловда иштирок этиш ҳуқуқига эга бўлган 21 миллиондан ортиқ фуқаро рўйхатга олинган бўлиб, уларнинг 16,2 миллиондан ортиғи овоз беришда иштирок этишган. Қонунга кўра, Марказий сайлов комиссияси 31 октябрга қадар сайловнинг аниқ натижаларини эълон қилиши керак. Шундан кейин икки ойлик муҳлат ичида янги сайланган президент ўз лавозимига киришиши лозим.
Ўзбекистон Конституциясига мувофиқ, бир шахс икки муддатдан ортиқ президент этиб сайланиши мумкин эмас. Мирзиёев учун бу иккинчи муддат.
Сайлов жараёнлари мамлакат ҳудудидаги 200 дан ортиқ сайлов участкаларига ўрнатилган 400дан кўпроқ видеокамералар орқали онлайн транслация қилинди.
Овоз бериш жараёнини 1672 нафар маҳаллий ва хорижий оммавий ахборот воситаларининг вакиллари томонидан ёритилди. Йигирмага яқин халқаро ташкилотлардан, элликка яқин давлатдан келган мингга яқин халқаро кузатувчилар кузатиб турдилар. Бундан ташқари, сайловда Президентликка номзод кўрсатган сиёсий партиялардан ва фуқароларнинг ўзини ўзи бошқариш органларидан 64 минг 450 нафар маҳаллий кузатувчи қатнашди.
Дастлабки маълумотларга кўра, сайлов жараёнида бирор жиддий қонунбузарлик аниқланмаган.
Оқбура, Бишкек
Расмлар ВВС сайтидан олинди.
