Келмасидан ғалва: Рус қўшиқчиларининг ташрифи Бишкекда катта мунозара туғдирди
Қирғизистон Мустақиллиги муносабати билан ўтказиладиган концерт аҳоли орасида норозилик туғдирди.
Бир неча кундирки, Қирғизистонда мустақиллик байрами муносабати билан 31 август куни пойтахт Бишкекнинг асосий майдонида ўтадиган байрам дастурида россиялик икки-уч қўшиқчининг иштирок этиши катта мунозарага сабаб бўлмоқда. Бу баҳсдан давлат раҳбари ҳам четда қолмади.
Одамларнинг бир қисмини норози қилган хабар 31 август куни Бишкекдаги марказий Ала-Тўў майдонида ўтадиган концертда россиялик хонандалар Стас Михайлов, Филипп Киркоров ва Люся Чеботина, шунингдек, швед хонандаси Боссон, италиялик қўшиқчи Инг-Гридларнинг ҳам иштирок этиши ҳақида бўлди.
Кимдир уларни Россиянинг Украинадаги босқинчилик урушини қўллаганликда айбласа, яна бошқалар Киркоровнинг ҳезалакнамо чиқишлари мамлакат аҳолиси аҳлоқи ва маданиятига тўғри келмаслигини айтади. Маълумки, ташқи кўриниши ҳам эркак, ҳам аёлникига яқин бўлган Киркоровнинг саҳнага ярим яланғоч ҳолатда чиқиб келавериши одатий ҳол.
Бир неча ой аввал Москвада кўпчилик машҳур кишилар иштирокида ўтган ва одамларнинг норозилиги, расмийларнинг ғазабига сабаб бўлган кечада Киркоров ҳам иштирок этган. Кечада эркак ва аёл санъаткорлар ва бошқа машҳурларнинг бир гуруҳи аввал эълон қилинган талабга кўра деярли яланғоч ҳолда иштирок этишган.
Украинадаги урушда минглаб одамлар ҳалок бўлаётган бир пайтда “юлдузларнинг” бу хурмача қилиқлари кўпчиликнинг норозилигига сабаб бўлган. Одамлар ҳатто уларнинг барчасини урушга жўнатишни талаб қилиб чиқишган. Шу билан бир вақтда номи тилга олинган россиялик эстрадачиларнинг Украинага қарши урушни қўллаб қувватлашлари ҳам кўпчиликка маълум. Бу ҳолат урушда Украина тарафдори бўлганларнинг норозилигига сабаб бўлиб келади. Шуни ҳисобга олган ҳолда анчадан бери Марказий Осиё давлатларида у ёки бу россиялик эстрада юлдузининг режалаштирган концертлари бекор қилиниб келади. Улар орасида Россиянинг Украинага қарши урушини қоралаб келган машҳур қизиқчи Максим Галкин ҳам бор.
Президент Садир Жапаров россиялик санъаткорларнинг келиши билан боғлиқ билдирилаётган норозилик кўринишларини «узоқни кўрмайдиган сиёсатчилар» ва уларнинг тарафдорлари билан боғлади. У «Кабар» давлат ахборот агентлигига берган анъанавий интервьюсида 31 август Қирғизистон Давлат мустақиллиги куни намойиш этиладиган концертда иштирок этадиган россиялик санъаткорларнинг келишини ижобий ҳодиса сифатида баҳолади.
У «илгарилари хориждаги кўпчилик Қирғизистон ҳақида деярли билмай келганини” иддао қилиб, энди аҳвол яхши томонга ўзгарганини айтди.
«Эсингиздами, бизни ҳеч ким танимайди, ҳеч ким юртимизга келишни хоҳламайди, деган замонлар бўлган? Ҳозир вазият ўзгарди: барча мамлакатлар Қирғизистон билан ҳисоблаша бошлади, – деди президент. – …Илгари ҳатто қўшниларимиз ҳам бизни жиддий қабул қилишмасди. Ҳозир, худога шукур, ҳамма нарса ўзгарди”.
Концертга норозилик билдирган танқидчиларни “иғвогарлар” деб атаган давлат раҳбари аҳолини уларга эътибор бермасликка чақирди.
“Кимгадир ёқмаса, эшитмасин. Биз ҳеч кимни [уларнинг қўшиқларини эшитишга] мажбур қилмаймиз,» – дея қўшимча қилди Жапаров.
Бир неча кун аввал Қирғизистон маданият вазири Алтинбек Мақсутов ҳам худди шундай кескин рухда гапириб, россиялик қўшиқчиларни эшитишни истамаганларга концертга келмай қўяқолишни тавсия қилган эди.
Жапаровнинг фикрича, “Мустақиллик байрами муносабати билан бизни табриклаб, концерт беришаётганларини хурсандчилик билан қабул қилишимиз керак”.
“Маълум бўлишича, улар гонорар олишмайди. Худо ёрлақасин уларни. Албатта, уларни уй-жой ва озиқ-овқат билан таъминлаймиз, меҳмондўстлигимизни кўрсатамиз,» – деди Жапаров “Кабар” раҳбарига.
Россияликларнинг чиқишлари бепул эканини аввал президент матбуот котиби ҳам айтиб чиққан, лекин бунга кўпчилик ишонмайди. Бюджетдан расмий пул ажратилмагани билан уларнинг “санъатини баҳолаб қўйиш” маҳаллий ишбилармонларга топширилган бўлиши мумкин деган тахминлар бор.
Умуман олганда, америкаликларда “бепул пишлоқ сичқон қопқонидагина бўлади”, деган машҳур гаплари бор. Россияликлар гонорар олмай куйлаб беришлари мумкин, бироқ бу ҳолда улар Россия учун катта сиёсий ютуқлар олиб беришади. Украинадаги уруш туфайли дунёнинг ривожланган давлатлари томонидан ҳар томонлама яккаланиб келаётган Россия мана шундай маданий ҳамкорликка ҳам муҳтож бўлиб турибди. Шуни ҳисобга олсак, россияликларнинг гонорарсиз қолмаслиги аниқ, улар Бишкекда бўлмаса Москвада яхшигина ҳақ олишлари ҳақиқатга жуда яқин.
Бу баҳсларда маҳаллий эстрада юлдузларининг ҳам иштирок этаётгани маълум. Кўпчилик қатори таниқли эстрада юлдузи Гулнара Тўйғўнбаева ҳам концертда россияликларнинг ўрнига маҳаллий санъаткорлар чиқса яхши бўлиши ҳақида фикр билдирган. Бу ҳақда у ўзининг Фейсбукда жавом этаётган баҳсларга жавоб тариқасида ўша ерда ёзган.
Оқбура, Бишкек.
Расм интернетдан олинди
