Ўзи билан олиб кетолмаганди: Собиқ депутатнинг 353 гектар ери давлатга қайтарилди
Темир контейнер билан ўралган бу ер Бишкек-Иссиқкўл йўлидан ўтганларнинг эътиборини тортиб келган.
Чуй вилояти Кемин туманига қарашли, пойтахтдан Иссиқкўлга борадиган йўлнинг шундоққина бўйида, бутун чегараси бўйлаб темир контейнерлар кесиб тўсиқ қилинган улкан ҳудуддаги ер участкаси йўловчиларнинг эътиборини тортмай қолмасди. Яқинда бу ерларнинг кимга тегишли экани маълум бўлди. Бугина эмас, бу участканинг ноқонуний йўл билан ўзлаштириб олингани ва энди давлатга қайтарилгани эълон қилинди.
Ноқонуний йўл билан қўлга киритилган ушбу мулкнинг нархи 4 миллиард 7 миллион сўмдан (47 млн. АҚШ доллари атрофида) кўпроққа баҳоланган. Бу пулга Қирғизистондаги нархлар билан ўрта ҳисобда 500 мактаб қуриш мумкин.
Ҳуқуқ-тартибот органлари тарқатган маълумотга кўра, бу ер участкаси VI чақириқ Жўғўрқу Кенеш депутати Нурланбек Кадикеевга тегишли бўлган. Юрак ҳуружидан 2018 йили вафот этган собиқ депутат 1970 йили Норин вилоятида туғилган. 2015 йили депутат бўлиб сайлангунга қадар молия полицияси ва божхона тизимларида ишлаган. Жумладан, 2005-2010 йилларда “Манас” аэропорти божхонаси бошлиғи бўлган.
Давлат хавфсизлик қўмитаси бу ер участкасининг ноқонуний йўл билан ўзлаштириб олганини аниқлагач, мулкни мерос сифатида олиб қолган марҳумнинг беваси уни ўз ихтиёри билан давлатга топширган.
Давлат мулкига қайтарилган ерларда давлат ипотека компанияси турар-жой биноларини қуриши ҳақида қарор қабул қилинди. Қирғизистон президенти матбуот котиби Асқат Алагўзовнинг Фейсбукда тарқатган хабарига кўра, бу ерда 100 мингга яқин оила ипотека асосида уй-жой сотиб олиши кўзда тутилмоқда. Бу ҳақда президент Садирбек Жапаров қарор қабул қилган.
Давлат мулкига қайтарилган ерларда давлат ипотека компанияси турар-жой биноларини қуриши ҳақида қарор қабул қилинди. Қирғизистон президенти матбуот котиби Асқат Алагўзовнинг Фейсбукда тарқатган хабарига кўра, бу ерда 100 мингга яқин оила ипотека асосида уй-жой сотиб олиши режалаштирилмоқда. Бу ҳақда президент Садирбек Жапаров тегишли қарор қабул қилган.
“Кемин-сити” деб аталадиган бу турар-жой мажмуасида қурилиш ишлари келаси йилнинг баҳорида бошланиши, ипотекани қайтариш муддати эса 20-25 йил деб белгиланиши кўзда тутилмоқда.
Сўнгги йилларда Қирғизистон раҳбарияти турли йилларда ноқонуний йўл билан ўзлаштириб олинган мулкларни давлатга қайтармоқда. Улар орасида йирик ер участкаларидан тортиб собиқ болалар боғчалари, турли ҳажмдаги саноат корхоналари ва бошқалар бор. Уларнинг ҳаммаси ўз даврида катта давлат лавозимини эгаллаб турган амалдорлар ва депутатларга тегишли экани маълум.
Мулк эгаларининг айримларига жиноий иш очилиб, тергов ишлари олиб борилмоқда. Мол-давлатнинг инсон боласига вафо қилмаслиги шу тариқа яна бир бор исботланмоқда.
Оқбура, Бишкек.
Расм ва видео интернетдан олинди
