Пул ҳисобни ёқтиради: Қирғизистон дипломатлар учун хорижда квартиралар сотиб олади
Чет эллардаги элчихоналар идоралари ва ходимлари учун квартиралар давлат бюджетига оғир юк бўлмоқда.
Қирғизистон президенти Садир Жапаров мамлакатнинг хориждаги элчихоналари ва бошқа дипломатик ваколатхоналари идоралари учун кўчмас мулк ва дипломатлар учун квартиралар сотиб олишга қарор қилинганини маълум қилди. Ҳозирда ўнлаб давлатларда Қирғизистон уйларни ижарага олиб келади. Бу эса анча қимматга тушмоқда.
Миллий «Кабар» давлат ахборот агентлигига берган навбатдаги интервьюсида Жапаров мисол тариқасида Қирғизистоннинг БМТдаги (Нью-Йорк шаҳрида) ваколатхонаси учун олинган идорани келтирди.
«Бизнинг вакилимиз у ерда 30 йилдан бери ижарага квартира олиб келади. Ойига 5 минг доллар ижара ҳақини тўлаяпмиз. Тасаввур қилинг, 30 йил ичида қанча пул сарфланган. Тўртта уйнинг қийматига тенг миқдорда маблағ ижара ҳақига кетган. Агар биз битта хонадонни биратўла сотиб олсак, у 10 йил ичида ўзини оқлаб, давлат мулки бўлиб қолади», – деди Садир Жапаров.
Жапаров аввалги давлат раҳбарлари ва вазирларнинг Қирғизистоннинг хориждаги элчилари, консуллари ва ходимлари учун квартиралар сотиб олиш масаласига бефарқ бўлганини эътироф этди. Унинг фикрича, бу ҳолатни тартибга солиш вақти етиб келди.
Умуман олганда, барча ваколатхоналар учун квартиралар ва офислар сотиб олиш бўйича топшириқ президент томонидан Қирғизистон Ташқи ишлар вазирлигига икки йил олдин берилган ва бу иш ҳозирда давом этмоқда.
Ҳозирда фақат уч давлатда Қирғизистоннинг элчихона идоралари давлат мулки сифатида сотиб олингани маълум.
Парижда Олимпиада ўйинларининг очилишига борган президент Садир Жапаров 26-июл куни Қирғизистоннинг Франциядаги элчихонасига ташриф буюриб. дипломатик ваколатхоналар ходимлари учун кўчмас мулк сотиб олинганини маълум қилган эди. Элчихона майдони 320 квадрат метр бўлган ва давлат ҳисобидан тўла сотиб олинган янги бинога кўчиб ўтган.
Жапаров бугунги кунда Қирғизистон Ташқи ишлар вазирлиги Венгриядан бино сотиб олингани, энди Швейцария, Австрия ва Россиянинг Новосибирск шаҳрида кўчмас мулк сотиб олиш бўйича ишлар олиб борилаётганини қўшимча қилди.
Оқбура, Бишкек.
Расм интернетдан олинди
