Амакисини уят қилди: Президент Садир Жапаров жияни учун халқдан кечирим сўради
Бўлажак куёв президент жиянининг қўлини сўраш учун вертолёт ёллаб, соатига 2300 доллар тўлаган.
Амалдорлар ва халқни ортиқча дабдабасиз, оддий яшашга ундаб келаётган Қирғизистон президенти Садир Жапаров ўзининг жияни Лаззат Нурғўжўева ва унинг бўлажак турмуш ўртоғининг тутган ишлари учун халқдан кечирим сўради.
Бу ҳақда давлат раҳбари ўзининг «Қабар» миллий ахборот агентлигига берган анъанавий интервьюсида айтди.
«Жияним учун халқдан узр сўрайман. У одамларнинг фикрига қулоқ тутади, бу воқеадан тўғри хулоса чиқариб олишига ишонаман. Бундан ташқари, у янги ҳаёт бошламоқчи, оила қурмоқчи. Умид қиламанки, улар ақл билан иш тутадилар», – деди Садир Жапаров, жияни ва бўлажак куёвини назарда тутиб.
Бир неча кун аввал кимлиги кенг маълум қилинмаётган бўлажак куёв президент жиянининг қўлини сўраш учун дабдабали маросим ташкил қилган. Бунинг у президентнинг жиянини вертолётда тоққа олиб чиқиб, унга ўзи билан турмуш қуришни таклиф қилган. Маросимда ҳар икки томондан ўнлаб одамлар иштирок этиб, воқеанинг видео тасвири ижтимоий тармоқларда тарқалган. Бу нарса кўплаб танқидларга сабаб бўлган. Маросим учун ишлатилган вертолёт мамлакат Фавқулодда ҳодисалар вазирлигига тегишли экани ҳам одамларда норозилик пайдо қилган.
Президент Жапаров яна бир бор давлат раҳбарининг яқин қариндош-уруғлари бошқаларга ўрнак бўлиши ва турли маросимларда исрофгарчиликка йўл қўймаслиги кераклигини айтган. У бўлажак куёв боладан норози эканини яширмаган.
«Ҳеч бўлмаганда бўлажак куёвим мени қўллаб-қувватлаб, ўйлаб қадам босиши керак эди. Агар президентга қариндош бўлиш нияти бўлса, ўзини ҳам, давлат раҳбарини ҳам танқид остига қўймаслик ҳақида ўйлаши керак. Оддий тарзда ҳам қўл сўраш мумкин. Агар улар бир-бирларини ёқтиришса, жияним уни рад этармиди», – деди Жапаров.
Жапаров бўлажак куёв боланинг ҳали ёш эканини айтиб, вазиятни юмшатишга ҳаракат қилган. Шу билан бирга у ўз жиянининг қилмиши учун фуқаролардан узр сўради.
Лазат Нурғўжўева норасмий ўтказилган “Қирғизистон гўзали” танлови ғолиби бўлгани билан маълум. Лекин бу танлов ва унинг натижасини халқаро “Сайёра гўзали” танлови ташкилотчилари тан олмаганлар. Халқаро гўзаллар танловида бошқа қиз Алтинай Бўтўярова иштирок этган. Унга президентнинг дўсти, Миллий хавфсизлик давлат қўмитаси раиси Қамчибек Ташиевнинг жияни уйланган.
Қирғизистон президенти давлатга тегишли вертолётдан фойдаланилгани бўйича ҳам изоҳ берди. Жапаров Фавқулодда ҳолатлар вазирлигида ҳозирда учта янги вертолёт борлигини эътироф этган. Вазирлик бу вертолётларидан ўз эҳтиёжлари учун тижорат асосида фойдаланиш ҳуқуқига эга. Тижорат учишларидан тушган пул ҳеч бўлмаганда техникани ёқилғи билан таъминлаб туришга яраб туриши мумкин.
Вазирлик эҳтиёжларини қондиришдан ташқари бу техниканинг доимий равишда учиб туриш лозимлиги, акс ҳолда уларда техник носозликлар пайдо бўлишини ҳам айтган президент, улардан истаган одам фойдаланиши мумкинлигини билдирган.
Шу йилнинг январида Мудофаа вазирлигига тегишли эски Ми-8 русумли вертолёт ҳалокатга учраб, экипаж раҳбари ҳалок бўлган ва 10 киши жароҳатланган. Учоқ эса бутунлай ишдан чиққан.
Оқбура, Бишкек.
Расм интернетдан олинди
