Бизникилар ҳам бор: АҚШ муҳожирларнинг кескин оқими олдида ожиз қолмоқда
Сўнгги уч йил ичида етти миллиондан ортиқ муҳожир АҚШ чегарасини ноқонуний кесиб ўтган.
АҚШнинг Монтана штатидан сайланган сенатор Стив Дэйнс матбуот анжумани ўтказиб, унда «юқори мартабали амалдор»га таянган ҳолда, 2023 йилда Марказий Осиёдан келган 50 мингдан ортиқ одам АҚШ чегарасини ноқонуний кесиб ўтганини айтди.
Бу ҳақда хабар берган Daily Mail нашрининг ёзишича, мамлакат ҳукумати ноқонуний мигрантлар оқимидан хавотирда. Улар муҳожирларнинг бундай оқими Америка Қўшма Штатларига хавф туғдириши мумкин.
Сенатор Стив Дэйнс муҳожирлар бўйича вужудга келган инқироз бўйича АҚШ президенти Жо Байденга хат ёзиб, тегишли чораларни кўришни сўраган. Daily Mail нашри келтирган расмий маълумотларга кўра, Байден ҳокимиятга келган 2021 йилдан бери 7,3 миллиондан ортиқ муҳожир АҚШ чегарасини ноқонуний кесиб ўтган. Бу Марказий Осиёдаги Қирғизистон, Тожикистон давлатлари аҳолисидан ҳам кўп демакдир.
Умуман олганда бу мавзу янги эмас ва сўнгги пайтда президентлик сайлови олдидан баҳларга сабаб бўлаётган асосий гаплардан бири бўлиб қолди. Чунки президентлик номзодлардан бири ўзининг президентлик даврида муҳожирлар сонини кескин қисқартириш бўйича чоралар кўрган. Жумладан, у мусулмон давлатларидан келаётган одамлар сонини чеклаш ва Мексика билан бўлган чегарада баланд тўсиқлар барпо қилиш ҳақида қарор қабул қилган.
Бу муаммо ҳақида АҚШнинг ва бошқа давлатларнинг етакчи нашрлари ҳам тинимсиз айтиб келишади.
Маълум бўлишича, ноқонуний муҳожирлар орасида Марказий Осиё давлатларидан борганлар ҳам талайгина экан. АҚШда бошпана сўровчилар аризаларини кўриб чиқиш жараёнини кузатиб борувчи TRAC нотижорат ташкилоти маълумотларига кўра, ҳозирда камида 40 минг марказий осиёлик муҳожирлар ана шу масала бўйича суд жараёнини кутмоқда.
Улардан энг кўпи – 17 минг нафари ўзбекистонлик, 7 минг нафари қирғизистонлик, 3 минг нафари тожикистонлик бўлса, 2,7 минг нафари Қозоғистондан ва 2 минг нафари Туркманистондан келган фуқаролардир.
Лекин Байден маъмурияти ўтган сайловларда Трампни енгиш учун ваъда қилган ва кейин амалга оширган чоралар натижасида ноқулай аҳволга тушиб қолган. Ўшанда Байден муҳожирларнинг Америкага келишини чекловчи қарорни бекор қилган ва буни миллий камситиш сифатида баҳолаган эди.
Энди эса, АҚШга Мексика орқали кириб келган Ўзбекистон фуқаролари Байден устидан судга мурожаат қилишган. Ҳозирда АҚШнинг турли муҳожирлар марказларида (қамоқхоналарда) сақланаётган бу фуқаролар судга берган даъволарида миллатига кўра дискриминация қилинганларини иддао қилишмоқда. Шу сабабли уларни қамоққа олиш тартибини ноқонуний деб эътироф этиш, ҳамда адвокатлар учун кетган ҳаражатларини давлат томонидан қоплаб берилишини сўрамоқдалар.
Муҳожирлар масаласи бугунги кунда президент Байденнинг бошига катта тўқмоқ бўлиб тушмоқда. Айниқса Мексикага яқин бўлган штатларда норозилик жуда кучли. Куни кеча икки номзоднинг Техас штатига буюрган ташрифи буни яққол намоён қилди.
Дональд Трампни штат губернатори ва миллий гвардия раҳбарлари кутиб олиб, кузатиб юришган бўлса, Жо Байден чегарада турган оддий чегарачилар билангина мулоқот қилишга муваффақт бўлган. Бир неча штат раҳбарлари ва аҳолиси Байденга очиқча қарши чиқиб, ундан истеъфога кетишни талаб қилишмоқда.
Бугунги кунда АҚШ аҳолиси сони ўсиб бораётган ғарб давлатларидан бири. Бошқа ғарб давлатлари каби туғилиш кескин камайиб кетган бу давлат аҳолиси айнан муҳожирлар ва уларнинг оилалари ҳисобига ўсишда давом этмоқда. Бугунги кунда мамлакат аҳолиси сони 340 миллионга етиб, дунёда Хитой ва Ҳиндистондан кейин учинчи ўринни эгаллаб турибди.
Оқбура, Бишкек.
Расм интернетдан олинди
