Олимпиада-2020: Қирғизистон олимпиадачиларининг байроқдори ўйиндан чиқди

Япониянинг Токио шаҳрида кеча очилган Олимпиаданинг биринчи куни қирғизистонлик спортчилар учун муваффақиятсиз бўлди.

Бугун, 24 июлда спортнинг ўқ отиш тури бўйича ўтган мусобақаларда иштирок этган қирғизистонлик спортчи Қаникей Қубаничбекова 612,8 очко тўплаб, 50 спортчи орасидан 48 ўринни олди. Олдинги ўринни олган 8 спортчи кейинги босқич мусобақаларида иштирок этади. Қаникей ўйиндан чиқди. У кеча Олимпиада ўйинларининг расмий очилишига бағишланган парадда сувда сузувчи Дениш Петрашов ҳамроҳлигида Қирғизистон байроғини кўтариб чиққан эди.

Эслатиб ўтамиз, ушбу Олимпиада ўйинларида Қирғизистондан спортнинг етти тури бўйича 16 спортчи иштирок этмоқда. Уларга 14 тренер, врач, массажчи, Миллий олимпиада қўмитаси ва турли спорт федерацияларининг вакиллари бўлиб 25 киши ҳамроҳлик қилмоқда.

Команданинг аъзоларидан бири, енгил атлетикачи Юлия Андреева сабабини тушунтирмаган ҳолда Японияга боришдан бош тортган эди.

Олимпиада ўйинлари аслида 2020 йили ўтиши керак эди, бироқ пандемияга боғлиқ сабаблар билан жорий йилга кўчирилган. Японияда Ковид-19 вирусига чалинганлар сони кўпайиши сабабли мусобақалар қаттиқ тартиб остида ўтмоқда. Бўлгани 5000 билет сотилиб, уларнинг эгалари ҳам ўйиноҳларга киритилмаслиги мумкин бўлиб турибди. Соат 21.00дан кейинги мусобақаларга умуман томошабинлар қўйилмайди. Бейсбол, футбол ва енгил атлетика бўйича мусобақаларга ҳам томошабинларни киритиш ман қилинган.

Бугун старт олган Олимпиада ўйинлари 8 августгача давом этади.

Кейинги мусобақаларда Қирғизистондан спорт кураши бўйича Айсулуу Тинибекова, Айпери Медет қизи, Мээрим Жуманазарова, Атабек Азисбеков, Жоламан Шаршенбеков, Ақжол Махмудов, Узур Джузупбеков, Эрназар Ақматалиевлар, эркин кураш бўйича Айаал Лазарев, дзюдо бўйича Владимир Золоев, енгил атлетика ва марафон югуриши бўйича Дарья Маслова ва Нурсултан Кенешбеков, қиличбозлик бўйича Роман Петров, оғир атлетикадан Бақдоолот Расилбеков ва сувда сузиш бўйича Денис Петрашовлар ўз маҳоратларини кўрсатадилар.

Уларнинг чиқишлари қуйидаги (24.kg Ахборот агентлиги тузган) жадвалда Бишкек вақти билан кўрсатилган:

Олимпиада ўйинлари пандемия шароитида унинг ўтказилишига қарши бўлган юзлаб японияликларнинг норозилик намойишлари остида ўтмоқда. Олимпиаданинг очилиш куни Токионинг ўзида даҳшатли вирусга чалинган 1 359 киши аниқланган. Бир киши ҳаёт билан видолашган.

Бобур Мирзоев, Оқбура, Бишкек
Суратда Қаникей Қубаничбекова. (Интернетдан олинди).

боғлиқ хабарлар

Изоҳ қолдиринг