Соғлигингизни асранг: Меҳнат муҳожирларига янги имкониятлар очиляпти
Энди Россияда ишлаётган Қирғизистон фуқаролари шифохоналарда бепул даволаниш имкониятига эга.
Бунинг учун меҳнат муҳожирлари рақамли мажбурий тиббий суғурта полисини олишлари керак. Ушбу ҳужжат билан муҳожирлар тиббий кўрикдан ва профилактик кўрикдан ҳам ўтишлари мумкин. Мажбурий тиббий суғурта полисини олиш учун Қирғизистон Меҳнат вазирлигининг Москвадаги ваколатхонасига мурожаат қилиш зарур.
“Фақат тўртта ҳужжатни тақдим этиш керак: Қирғизистон фуқаросининг паспорти, СНИЛС (шахсий ҳисоб суғурта рақами. – таҳр.) сертификати ва унинг қонуний равишда Россияда жойлашганлиги тўғрисидаги меҳнат шартномаси. Тўртинчиси, миграция рўйхатидан ўтганлиги тўғрисидаги маълумотнома, яъни қонуний асосда”, — деди Қирғизистон Республикаси Ижтимоий ҳимоя ва миграция вазирлиги ҳузуридаги Фуқароларни хорижда ишга жойлаштириш маркази директори Бақтибек Қудайбердиев.
Аввалроқ Россия муҳожирлар учун эслатма яратишга қарор қилган эди. У чет элликларнинг ҳатти-ҳаракатлари қоидалари ва меъёрларини тартибга солади.
Вазирлик меҳнат муҳожирлари Россияда рақамли мажбурий тиббий суғурта (МТС) полисини қандай қилиб текин олиши мумкинлигини тушунтириб маълумот тарқатди.
Махсус департаментнинг таъкидлашича, 15-февралдан бошлаб Москвада ишлаётган қирғизистонликлар рақамли мажбурий тиббий суғурта полиси олиш учун мурожаат қилишлари мумкин. Бунинг учун вазирликнинг Малая Полянка кўчаси, 7-уй, 5-иншоот. манзилидаги ваколатхонасига бориш керак.
Рўйхатга олиш пайшанба кунлари соат 11.00 дан 17.00 гача юритилади.
Рақамли полис олиш бепул. Уни олиш учун қуйидаги ҳужжатларнинг асл нусхаларини тақдим этишингиз керак (18 ёшдан ошган чет эл фуқаролари учун):
- чет эл фуқаросининг паспорти;
- меҳнат шартномаси;
- шахсий ҳисоб суғурта рақами (СНИЛС) (мажбурий);
- чет эл фуқаросининг Россияда юргани тўғрисидаги билдирувнинг тегишли қисми.
Рақамли мажбурий тиббий суғурта полиси сизга қуйидагиларга имкон беради:
- бутун Россия ҳудудида бепул тиббий ёрдам олиш;
- клиник кўрик ва профилактика текширувидан ўтиш;
- ихтисослаштирилган тиббий ёрдам олиш учун ўзингизга қулай тиббий муассасани танлаш.
Расмий маълумотларга кўра, бугунги кунда Россия Федерациясида 1 миллиондан ортиқ қирғизистонлик меҳнат қилиб юргани айтилади. Аммо сўнгги вақтларда муҳожирларга бўлган турли талаб ва қонунлар ортидан ушбу рақамлар бироз қисқарган. Бу аксари ҳолларда Россия паспортини олган муҳожирларни Украинадаги урушга жалб қилишга уринишлар билан боғлиқ.
Оқбура, Бишкек.
Расм интернетдан олинди
