Номинг ўчсин уруш! Бекзоднинг оиласига Бишкекдан квартира бериладими?
Прапоршик Бекзод Юлдашев шу йилнинг баҳорида Боткен вилоятида Тожикистон билан чегарада бўлган урушда ҳалок бўлган.
Ҳалок бўлган қаҳрамоннинг оиласига Бишкекдан квартира ажратиб бериш масаласини ҳал қилишни сўраб, Бишкек шаҳри мэри вазифасини бажарувчи Бақтибек Қудайбергеновга Қирғизистон вазирлар маҳкамаси раисининг биринчи ўринбосари Айбек Жунушалиев 25 июнда мурожаат қилган. Бишкек шаҳар кенгашининг тегишли қарори лойиҳаси унинг сайтида жамоатчилик муҳокамасига қўйилган.
Эслатиб ўтамиз, Қирғизистон Республикаси чегара қўшинлари прапоршиги Бекзод Юлдашев шу йилнинг 28-29 апрелида Қирғизистон-Тожикистон чегарасида юз берган қуролли тўқнашувда ўз хизматини ўташ чоғида ҳалок бўлган. Унинг ортидан 6 яшар қизи ва икки ўғли қолган. Катта ўғли 5 ёшга кирган, кенжаси 6 ойлик бўлган эди. Ўлимидан сўнг Бекзод Юлдашев “Эрдик” (Жасорат) медали билан тақдирланган.
Жамоатчилик муҳокамасига олиб чиқилган ҳужжатда айтилишича, чегарадаги урушдан кейин Бекзод билан бир қаторда “Эрдик” медали билан яна икки ҳарбий, Эсентур Қубаничбеков ва Нурсултан Манасбек уулу тақдирланишган. Уларга ўлимидан кейин уй қуриш учун участкалар ажратиб берилган, Юлдашевнинг оиласига квартира ажратиш масаласи ҳал бўлмай қолган эди.
Ўтган ҳафта оммавий ахборот воситалари қаҳрамоннинг беваси Гулҳаё Қодировага президент Садир Жапаров номидан квартиранинг калити топширилгани ҳақида ёзишди. Бу ҳақда биринчи бўлиб таниқли жамоат арбоби Ассоль Мўлдўқматова хабар берган.
Бекзод Юлдашев Қирғизистон қуроллик учларининг “Бўри” махсус қисмида 8 йил хизмат ўтаган. Қариндошларининг айтишича, яқинда унинг янги ҳарбий унвон олиши кутилаётган, 3 йилдан кейин эса истеъфога чиқиши керак эди. Чегарада Тожикистон ҳарбийлари билан бўлган қуролли тўқнашув бошланганда Бекзод Юлдашев бошқа жангчилар билан у ерга жўнатилган.
Жанггоҳга кетаётиб Бекзод яқинларига унга телефон қилмасликни сўраган. Сабаби, жиринглаган телефон товуши ёки ёруғи уларни душманга нишон қилиб бериши мумкин эди. Ўзи имкон топганда аёли Гулҳаёга қўнғироқ қилиб, кейинги сафар видео қўнғироқ қилганда кенжа ўғлининг кулишини бир кўрсатишни сўраган. Лекин чақалоғининг табассумини кўриш унга бошқа насиб қилмаган экан.
“Бўри” жангчилари аскарларимизга ўқ-дори етказиб бериш чоғида ўққа тутилган. Ён томондан отилган дайди ўқ қўлтиқ остидан бронежилетни четлаб ўтган. Юлдашевнинг ҳалок бўлгани ҳақида яқинлари ижтимоий тармоқларда пайдо бўлган сурат орқали хабар топишган.
Аталган қуролли тўқнашувда Тожикистон томон кутилмаганда оғир ҳарбий техника, ҳатто вертолётлардан фойдаланган ва тинч аҳоли яшаган қишлоқларни ўққа тутган. Оқибатда Қирғизистон томондан 36 киши ҳалок бўлиб, 189 нафари ярадор бўлган. 40 мингга яқин боткенликларни хавфсиз жойларга кўчиришга тўғри келган.
Шунингдек, 200 ортиқ турли ижтимоий, ҳарбий объектларга, жумладан 138 турар-жойга жиддий зарар етказилган, ёки бутунлай яксон қилинган. Норасмий маълумотларга кўра, Тожикистон томондан 16 киши ҳалок бўлиб, 150 нафари ярадор бўлган.
Абдумўмин Мамараимов, Оқбура, Бишкек
Расмлар интернет булоқларидан олинди.
